Turmush — Балыкчы шаарында 13 жаштагы баланы ит тиштеп, соттук-медициналык экспертиза дайындалды. Бул тууралуу милициядан билдиришти.

Маалыматка ылайык, 29-март күнү болжол менен саат 21:45 чамасында Балыкчы шаардык ички иштер нөөмөт бөлүмүнө шаардык ооруканасынан 2010-жылы туулган баланы ит каап алгандыгы тууралуу билдирүү келип түшкөн.

Жерине тергөө-ыкчам тобу чыгып, буларды аныкташкан. Аталган өспүрүм бала көчөдө кетип бара жатканда бир нече ит каап, бири бутун тиштеп алган. Ал ит Балыкчы шаарынын 1963-жылы туулган тургунуна таандык болгон. Анын айтымында, ити уулуп жаткандыктан, аны сыртка кое берип койгон. Ал баланын энесинен кечирим сурап, өкүнгөндүгүн билдирген. Ал эми жабырлануучунун ата-энеси арыз жазуудан баш тартышкан.

Учурда соттук-медициналык экспертиза дайындалган.

Буга чейин Ысык-Көл облусунун Балыкчы шаарында итке таланып, ыйлаган баланын видеосу социалдык тармактарга тараган болчу.