Turmush — Нарын район аралык ооруларды алдын алуу жана мамлекеттик санитардык-эпидемиологиялык көзөмөлдөө борбору Ат-Башы районунун Ак-Сай өрөөнүндөгү Коёнду-Колот жайлоосунда Сибирь жарасынын очогу бар жерден үлгү алып, жыйынтыгы оң болуп чыкканын аталган борбордун Ат-Башы району боюнча бөлүмүнүн башчысы, дарыгер-эпидемиолог Нургүл Каипова райондук штабда айтып чыкты.

Ал белгилегендей, коркунучу бар жер мал кире албагандай тосулушу керек.

«Ат-Башы районунда Сибирь жарасынын 6 очогу бар. Ошол жерлер жыл сайын жаз жана күз мезгилдеринде жугушсуздандырылып турат. Ошол очоктордун биринен үлгү алганда оң белги берди. 2020-жылы ал очок Ак-Моюн айыл өкмөтү тарабынан тосулган. Бирок дагы бийик кылып тосуу керек болуп жатат. Ал жер токой чарбага тиешелүү. Ошол жакта дагы деле малдар жүрөт», — деди Нургүл Каипова.

Бул боюнча район башчысы Эмилбек Абдыкадыров тезинен чара көрүү боюнча протокол жазды.

Ат-Башы райондук ветеринардык-фитосанитардык коопсуздук боюнча башкармалыгынын башчысы Үмөтаалы Саалаев бул 6-очок болуп каттоого алынган жер экенин, аталган бөлүмдүн кызматкерлери тарабынан жугушсуздандыруу иштери жүрөрүн билдирди.