Turmush — Ак-Суу районунун Челпек айыл аймагынын Бурма-Суу айылындагы бир нече көчөнү жана турак жайлардын короолорун сел каптады. Учурда каналдарды бекемдөө жана турак жайларды тазалоо иштери жүрүп жатканын райондук жарандык коргонуу штабынан билдиришти.

Маалыматка караганда, бүгүн, 13-июлда саат 14:00 чамаларында нөшөрлүү жааган жаандан кийин 4 коктудан чогулуп келген суунун кесепетинен ички чарбалык каналдан суу ташып, 5 үйдөгү алма бак, карагат жана жерлерди алып, 3 үйдүн жер төлөсү сууга толгон. Ыкчам түрдө сел каптаган жерге райондун акими, айыл өкмөт башчысы, райондук суу чарба башкармалыгынын жана райондук өзгөчө кырдаалдар бөлүмүнүн кызматкерлери барган.

Челпек айыл өкмөтү тарабынан 1 даана экскаватор техникасы менен ички чарбалык каналдын жээктерин бекемдөө жана тазалоо иш-чаралары жүргүзүлдү. Ал эми суу каптаган короо жайлардагы сууну сордуруу үчүн 1 даана АСМ автоунаасы, 3 аскер кызматкери жана 1 даана мотопомпа тартылды.

Алдын ала маалымат боюнча, селдин кесепетинен Бурма-Суу айылындагы 8 турак үйдүн короо жайын суу каптаган. Адам өмүрү кыйылган жок.

Чыгымды эсептөө үчүн атайын комиссия жеринде иш алып барат.

Буга чейин Ак-Суу районунда мөндүр аралаш жаан жаап, үйлөрдүн короосун суу каптаганы маалымдалган.