Turmush — Ысык-Көл районунун Бостери айылында «Берекелүү күз» аталышындагы түшүм майрамы өттү. Бул тууралуу аймактык кабарчы билдирди.

Маалыматка караганда, иш-чара айыл өкмөтү тарабынан уюштурулган.

Айыл өкмөтүнүн башчысы Курманбек Сопиевдин айтымында, быйыл өзгөчө буудай, арпа айдагандар мол түшүм алышкан. Анткени жазгы айдап-себүү иштери башталганда, дыйкандар жаңы үрөндөн алып себишкен. Аймакта мол түшүм алган дыйкандардын кубанычын, ушундай иш-чара өткөрүү менен белгилеп жатышканын кошумчалады.

Түшүм майрамына арналып жасалган түркун эмгектердин сынагы өтүп, Бостери жана Бактуу-Долоноту айылынын тургундары, андагы бала бакча жана мектептин жааматы катышты. Мунун менен катар иш-чара спорттук мелдеш жана концерттик программа менен коштолду.