Turmush — Чүй облусунун Сокулук районундагы Военно-Антоновка айылында «КАМАЗ» жүк ташуучу унаасы мотоциклчен кишини сүздү. Бул тууралуу аймактык кабарчыга күбөлөр билдиришти.

Сокулук райондук ооруканасынан кабарлашкандай, кырсык саат 10:20да Фрунзе менен Ала-Арча көчөлөрүнүн кесилишинде болгон.

«42 жаштагы мотоцикл айдаган А.Б Сокулуктун ооруканасына алынып келген. Ага сыныктар бөлүмүнүн кызматкерлери жардам берип, андан соң Беловодск айылындагы ооруканага жиберилди. Себеби биздин сыныктар бөлүмүндө оңдоп-түзөө иштери жүрүп жатат», — дешти Сокулуктун медиктери.

Жабырлануучу баш сөөгүнөн, баш мээсинен, бутунан жаракат алган. Оң далынын сөөгү чыгып кеткен.