Turmush — Бүгүн, 19-апрелде Жалал-Абад облусунун Аксы районунун Кербен шаарында райондук архитектура башкармалыгынын эки кабаттуу заманбап имаратынын курулушу башталып, пайдубалына капсула салынды. Бул тууралуу аймактык кабарчы билдирди.

Иш-чарага президенттин Жалал-Абад облусундагы ыйгарым укуктуу өкүлү Абсаттар Сыргабаев катышты. Облус башчысы имарат кызматкерлерге шарт түзүү, калкты заманбап тейлөө максатында курулуп жатканын белгиледи.

Райондун архитектура башкармалыгынын кызматкерлери 1995-жылдан бери административдик имарат жоктугунан ижарага ар кайсы мекемелердин имаратында иштеп келишкен. Жаңы имаратты курууга жалпы 8 млн сомго жакын каражат бөлүнгөн. Анын 4 млн сому райондун өнүктүрүү фондунан, калган сумма мекеменин жеке салыгынын эсебинен каржыланууда.