Turmush — Ала-Бука милициясы чөнтөк уурулукка шектелген жаранды кармады. Бул тууралуу Жалал-Абад ОИИБдин басма сөз кызматы билдирди.

Маалыматка караганда, Ала-Бука РИИБге 4 жаран арыз менен кайрылган. Алардын бири 2024-жылдын 21-январь күнү мал базарда кийип жүргөн курткасынын чөнтөгүнөн 45 миң сом акчасын уурдатканын жазган. Ал эми 3 жаран 2024-жылдын 17-мартында Ала-Бука районунун борбордук базарынан күндүзгү убакытта телефон жана акчаларын белгисиз кылмышкерге уурдатканын билдиришкен.

Жалпысынан арыз ээлери 75 миң сомго жакын материалдык зыян тартышкан.

Бул фактылар Ала-Бука РИИБи тарабынан кылмыштардын бирдиктүү реестрине катталып, Кылмыш-жаза кодексинин 205-беренеси (уурдоо) менен кылмыш иши козголгон.

Ала-Бука милициясы тарабынан жүргүзүлгөн ыкчам иликтөө иштеринин натыйжасында кылмыш ишине шектүү катары Ош облусунун Өзгөн районунун 1985-жылы туулган тургуну У.У. кармалган.

Учурда тергөө амалдары жүрүүдө.