Turmush — Ысык-Көл облусунда 29-майдан тарта бир нече күн тынбай жааган кар учурда ээрий элек. Анын кесепетинен жайлоолорго баруучу жол жабылып, мал-жандыктар өлүүдө.

КРдин Өзгөчө кырдаалдар министринин орун басары Эделбек Кулматов төмөнкүлөргө токтолду.

«Барскон айылынан Ак-Шыйрак айылына чейин 208 чакырым болсо, кечээ саат 21:00дө техника 150-чакырымга чейин тазалап барды. Бүгүн да тазаласа, түндө жол ачылып калат деп жатабыз. Ал жерде учурда 3 техника иштеп жатат. Жол ачылса, 5 унаа 800 түк чөп жеткирүүгө даяр турат. Жергиликтүү жашаган тургундар бар. Мал-жандыктардан чыгаша болуп жатат. Ал эми жабыркаган, жаракат алган тургундар жок. Ак-Шыйрак жана анын жанындагы айылда жалпы 341 жаран жашайт», — деди ал.

Ошондой эле Ак-Суу районунун Кайыңды жайлоосунда карай тазалоо иштери жүрүп жатканын айтып, жакын арада бул жайлоого да жол ачыларын айтты.