Turmush — Нарын облусунун Кочкор районунда жөө адамды унаасы менен сүзүп, качып кеткен айдоочу кармалды. Бул тууралуу ИИМдин Жол кыймылынын коопсуздугун камсыздоо башкы башкармалыгынан билдиришти.

Маалыматка караганда, 2023-жылдын 5-январында саат 22:15 чамасында Кочкор районунун Кочкор—Арал унаа жолунун 22-чакырымында белгисиз унаа белгисиз жаранды сүзүп, айдоочу окуя болгон жерден изин жашырган. Анын кесепетинен болжол менен 35-40 чамасындагы азиат түспөлүндөгү жаран окуя болгон жерден көз жумган.

Бул факт боюнча ЖКККББнын издөө бөлүмү жана Нарын ОИИБ боюнча жол кыймылынын коопсуздугун көзөмөлдөгөн кызматкерлер ыкчам издөө иш-чараларын жүргүзүп, кылмыштын изи сууй электе шектүү катары «Schmitz PR 24» (Хово) үлгүсүндөгү оор жүк ташуучу унаанын 1995-жылы туулган айдоочусу Б.у.А. кармалды. Ал тергөө кызматына өткөрүлүп берилди.