Turmush — Ысык-Көлдө 3 жаштагы баланын өлүмүнө айыпталган аял темир тордо калды.

2022-жылдын 12-октябрында Жогорку соттун жазык иштери жана жоруктар жөнүндө иштер боюнча соттук коллегиясы соттолуучунун жактоочусу Т.А.А.нын кассациялык даттануусунун негизинде ишти кайра карап чыккан.

Ысык-Көл облусунун ички иштер башкармалыгынын басма сөз кызматынын маалыматына караганда, РИИБдин нөөмөт бөлүмүнө 2021-жылы 15-май күнү саат 12:32 чамасында аймактык оорукананын жандандыруу бөлүмүнөн Кызыл-Суу айылынын 38 жаштагы М.Д. жана 33 жаштагы М.Г. аттуу тургундары денесинде көк ала тактары ​​бар, эс-учун жоготкон 3 жаштагы баланы ооруканага жеткиргени боюнча билдирүү түшкөн. Бала оорукананын жандандыруу бөлүмүнө жаткырылып, эс-учуна келбей көз жумган.

Бул факт Жоруктар жөнүндөгү (эски редакция) кодекстин 65-беренесинин (уруп-сабоо) негизинде Кылмыштар жана жоруктардын бирдиктүү реестрине катталган.

Кылмыштын себептерин жана жагдайларын аныктоо үчүн райондук ИИБдин тергөө-ыкчам тобу окуя болгон жерге барышкан. Күбөлөрдү сурамжылоонун жүрүшүндө баланын энеси уулун 33 жаштагы М.Г. аттуу кудачасына таштап, Россия Федерациясына иштегени кеткени аныкталган.

Баланы караган аялдын айтымында, 15-майда болжол менен саат 12:00 чамасында наристенин талмасы кармап, тепкичтен кулаган. Ал эми баланын денесиндеги көгөргөн тактар аны бир нече жолу чымчыгандан улам пайда болгон.

Масылкан (аты өзгөртүлдү, М.Г.Б.) 1982-жылы Ысык-Көл облусунун Түп районунда туулган, билими орто, эч жерде иштебейт. Мурда сот жообуна тартылган.

Тергөө органдарынын маалыматына караганда, айыпталуучу Масылкан 2021-жылдын 13-майында Кемин районунун Тогуз-Булак айылына караштуу кашарда 1983-жылы туулган Г.Т.Б.нын 2018-жылы туулган баласы Б.К.А. менен тамак ичип жаткан. Ошол учурда наристе отурган жеринен сийип койгон. Ошондо Масылкан эмоциясын башкара албай, Б.К.А.ны ур-токмокко алып, өлүмгө жеткирген жаракат келтирген.

Б.К.А. 2021-жылы 15-майда саат 14:55 чамасында Жети-Өгүз райондук ооруканасында көз жумган.

Соттук-медициналык эксперттин алдын ала маалыматы боюнча, бала башынан оор жаракат алган. Сотко чейинки өндүрүш иштеринин алдын ала корутундусунун негизинде Жоруктар жөнүндөгү кодекс Жазык кодексинин 138-беренесинин 3-бөлүгүнүн 1-пунктуна (ден соолукка оор жаракат келтирүү, байкабастыктан өлүмгө дуушар кылуу) өзгөртүлгөн.

Кылмышка шектүү катары 33 жаштагы М.Г.ны милицияга жеткиришкен.

Жети-Өгүз райондук сотунун 2022-жылдын 29-апрелиндеги өкүмү боюнча Масылкан Жазык кодексинин (2017-жылдагы редакция) 138-беренесинин 3-бөлүмүнүн 1-пункту менен күнөөлүү деп табылып, 8 жылга эркиндигинен ажыратылган.

Кылмыш-жаза кодексинин 82-беренесинин негизинде 4 жылдык мөөнөткө пробациялык көзөмөл колдонулган.

Андан кийин Ысык-Көл облустук сотунун жазык иштери жана жоруктар жөнүндө иштер боюнча соттук коллегиясынын 2022-жылдын 14-июлундагы өкүмү менен Ысык-Көл облусунун Жети-Өгүз райондук сотунун 2022-жылдын 29-апрелиндеги өкүмү өзгөртүлгөн. Анда пробациялык көзөмөл жокко чыгарылган. Өкүмдүн калган бөлүгү өзгөртүүсүз калтырылып, Масылкан сот залынан камакка алынган.

Сот отурумунда айыпталуучу Масылкандын жактоочусу Т.А.А.нын кассациялык даттануусунда Ысык-Көл облустук сотунун жазык иштери жана жоруктар жөнүндө иштер боюнча соттук коллегиясынын 2022-жылдын 14-июлундагы өкүмүн жокко чыгарып, Ысык-Көл облусунун Жети-Өгүз райондук сотунун 2022-жылдын 29-апрелиндеги өкүмүн күчүндө калтырып берүүнү суранган.

Жыйынтыгында Ысык-Көл облустук сотунун жазык иштери жана жоруктар жөнүндө иштер боюнча соттук коллегиясынын 2022-жылдын 14-июлундагы өкүмү күчүндө калды.

Жактоочунун кассациялык даттануусу канааттандыруусуз калтырылды.

Токтом акыркы, даттанууга жатпайт.