Turmush — Нарын райондук милициясы көчмө кабылдама менен айыл аймактарды кыдырууда. Бул тууралуу Нарын ОИИБдин басма сөз кызматынан билдиришти.

Маалыматка караганда, учурда айыл жергелеринде ата-энесинин көзөмөлү жок агын суу, көлмө, каналдарга түшкөн жаш өспүрүмдөр ар кандай кырсыктарга кабылып жатышат. Нарын РИИБдин жетекчилиги тарабынан Хутор жана Ак-Талаа айылындагы жаш өспүрүмдөргө жана ата-энелерине профилактикалык түшүндүрүү иштери жүргүзүлүүдө. Ошондой эле чоң агын суулардын жээктерине эскертүү такталары орнотулду.

Мындан сырткары Нарын районунун Жан-Булак айылында милициянын көчмө кабылдамасы жеринде дин боюнча айыл тургундарына жана башка жактардан келген дааватчыларга мыйзамдуулукту түшүндүрүү боюнча иш алып барылууда.