Turmush — Сузак районунда уруп-сабоого шектелген жаран кармалды. Бул тууралуу Жалал-Абад ОИИБдин басма сөз кызматы билдирди.

Маалым болгондой, Сузак РИИБге 1975-жылы туулган Б.Б. аттуу жаран арыз менен кайрылып, 2024-жылы 15-январь күнү сырттан тааныш болгон бала пикир келиспештиктен улам уруп-сабагандыгын айткан. Натыйжада Б.Б. денесинен алган жараатынан улам Сузак райондук ооруканасына жаткырылган.

Дайындалган соттук-медициналык экспертизанын корутундусуна ылайык, арыз ээси анча оор эмес дене жараат алгандыгы аныкталган.

Бул факт Сузак РИИБдин тергөө кызматы тарабынан Кылмыштардын бирдиктүү реестрине Кылмыш-жаза кодексинин 131-беренеси (ден соолукка анча оор эмес залал келтирүү) менен катталып, кылмыш иши козголгон.

2024-жылдын 19-март күнү Жалал-Абад ОИИБдин жана Сузак РИИБдин кылмыш иликтөө бөлүмүнүн, ИИМдин атайын багыттагы полкунун Жалал-Абад шаарындагы өзүнчө ротасынын кызматкерлери тарабынан кылмыш ишине шектүү катары Сузак районунун 1983-жылы туулган тургуну Т.Б. кармалып, КЖПКнин негизинде убактылуу кармоочу жайга киргизилген.

«Арыз ээси жана кылмыш ишине шектүү жаран кылмыштуу чөйрөнүн мүчөлөрү менен тыгыз байланышта болушкан», — деп айтылат маалыматта.

Учурда тергөө амалдары жүрүүдө.