Turmush — Ош—Бишкек унаа жолундагы жол-транспорт кырсыгынын кесепетинен 2 адам каза болду. Бул маалыматты Жалал-Абад ОИИБдин жол кыймылынын коопсуздугун камсыздоо бөлүмүнөн тастыкташты.

Маалыматка караганда, жол кырсык 22-сентябрда Ош—Бишкек жолунун 220-чакырымында, тактап айтканда Ала-Бел ашуусунда болгон. Кырсык тууралуу билдирүү Токтогул райондук ички иштер бөлүмүнө түшкөн.

Кара-Көл шаарынын 29 жаштагы тургуну Т.И. «Мазда 6» үлгүсүндөгү унаасы менен Бишкек багытында бара жатып, рулду башкара албай, карама-каршы тилкеге чыгып, Ош багытында келе жаткан «Субару Легаси» менен кагышкан. Экинчи унааны Бишкек шаарынын 1976-жылы туулган тургуну О.Н. башкарып келе жаткан. Кырсыктын кесепетинен «Субару Легасинин» жүргүнчүсү — 2021-жылы 9-декабрда төрөлгөн А.А. (кыз бала) менен «Мазданын» айдоочусу окуя болгон жерде көз жумду.

Кырсыктан жаракат алгандар:

— «Субару Легаси» унаасынын жүргүнчүсү — Токтогул районунун Арал айылынын 1993-жылы туулган тургуну А.Э. (аял киши);

— «Субару Легаси» унаасынын жүргүнчүсү — Бишкек шаарынын Көк-Жар кичи районунун 1972-жылы туулган тургуну К.Р. (аял киши):

— «Субару Легаси» унаасынын айдоочусу О.Н.

Алар Токтогул райондук жалпы дарыгерлер практикалоо бөлүмүнө жаткырылды.