Turmush — Баткен шаарында Улуу Жеңиштин 78 жылдыгы белгиленүүдө. Салтанат шаардын И.Раззаков көчөсүндөгү эстеликке гүл коюу менен башталды, деп билдирди аймактык кабарчы.

Жергиликтүү тургундар, мекеме-ишканалардын кызматкерлери, бийлик өкүлдөрү жөө жүрүшкө чыгышты.

Жүрүштүн катышуучулары андан ары Баткен шаарынын борбордук стадионуна барып, концерттик программага күбө болушту. Ага облустагы тылда эмгектенген баатырлар чакырылган. Мындай иш-чара облустун башка район, шаарларында да белгиленүүдө.

Облуста Улуу Ата Мекендик согуштун катышуучулары калган эмес. Ал эми тылдын 90 ардагери бар. Аларга жыл сайын 9-майда мамлекет тарабынан 15 000 сомдон сыйлык берилет. Мындан сырткары ай сайын 1000 сомдон каражат чегерилген.