Turmush — Ош облусунун Араван районуна караштуу Маданият айылындагы дыйкандар биринчилерден болуп картошка жана сарымсактык түшүмүн алып, сатыкка чыгарышты. Бул тууралуу аймактык кабарчы билдирди.

Маалыматка караганда, 2-3 күн аралыгында болгар калемпирин жыйноо иштери башталат. Бышкан түшүмдү кардарлар дароо эле алып кетишүүдө.

«Быйыл райондогу ички каналдар тазаланып, 9-апрелден тарта суу эрте бериле баштаган. Өткөн жылдарга салыштырмалуу быйыл түшүм 10-15 күнгө эрте бышып, эрте жыйналууда», — деди Араван районунун акиминин орун басары Музафар Мамасаитов.

Жаңы бышкан картошканын килограммы 50 сомдон бааланды. Ал эми сарымсактын бир башы 6 сом. Болгар калемпири 100-150 сомдон сатылары күтүлүүдө.