Turmush — Майлуу-Суу жалпы дарыгердик практикалык борборунда мамлекетке 250 миң сомго жакын зыян келтирилгени аныкталды. Бул тууралуу Turmush басылмасына Майлуу-Суу шаардык прокуратурасы кабарлады.

Маалым болгондой, ушул тапта келтирилген чыгым ордуна келтирилип, кызмат адамдарына тартиптик жоопкерчилик чегирилген.

«Иш планга ылайык Майлуу-Суу шаарынын жалпы дарыгерлик практикалык борборунда эмгек мыйзамдарынын аткарылышы текшерүүгө алынып, анан алкагында аталган жайда эмгектенген жооптуу адамдар тарабынан бир катар кызматкерлер менен мөөнөттөрү мыйзамда белгиленген нормадан ашкан жумуштарды аткаруу үчүн 5 кызматкер менен эмгек келишимдери түзүлгөндүгү аныкталган. Жогорудагы мыйзамсыз түзүлгөн эмгек келишимдердин кесепетинен мамлекетке 249 миң 908 сом зыян келтирилген. Жыйынтыгында Майлуу-Суу шаарынын прокуратурасы тарабынан Майлуу-Суу шаарынын жалпы дарыгерлик практикалык борборуна прокурордук чара көрүү актысы келтирилип, аны кароонун натыйжасында мамлекетке келтирилген зыяндын орду толугу менен өндүрүлүп, жогорудагы мыйзам бузууларга жол берген кызматкерлер тартиптик жоопкерчиликке тартылды», — деп айтылат маалыматта.