Turmush — Ысык-Көл облусунун Ак-Суу районунда 14 айыл аймак бар. Административдик аймактык реформанынын негизинде 6 айыл аймакка ирилештирилет. Учурда район аймагында түшүндүрүү иштери жүрүгүзүлүп жатканын Ак-Суу райондук администрациясынын аппарат жетекчиси Адилет Карыпбеков билдирди.

Анын айтымында, президенттин жарлыгы чыкса, реформанын алкагында 6 айыл аймактын аталышы төмөнкүдөй болот:

1. Теплоключенка, Кереге-Таш айыл аймактары биригип, Кыдыр-Аке айыл аймагы деп аталат.

2. Боз-Учук, Жыргалаң, Ак-Чий, Ак-Булуң айыл аймактары биригип, Хан-Теңири айыл аймагы деп аталат.

3. Отрадное, Тепке, Каракол айыл аймактары биригип, Каракол айыл аймагы деп аталат.

4. Октябрь, Кара-Жал айыл аймактары биригип, Алтын-Арашан айыл аймагы деп аталат.

5. Челпек, Бөрү-Баш айыл аймактары биригип, Кашка-Суу айыл аймагы деп аталат.

6. Эңилчек айыл аймагы чек арага жакын жайгашкандыктан өзүнүн аталышы калтырылат.

Жыл башында Түп районундагы 13 айыл өкмөтү 5 айыл өкмөтүнө бириктирилген. Бул биригүү президент Садыр Жапаровдун 2022-жылдын 28-декабрындагы №414 «Кыргыз Республикасынын Ысык-Көл облусунун Түп районунун айыл аймактарынын деңгээлинде пилоттук режимде административдик-аймактык реформа жөнүндө» жарлыгынын негизинде ишке ашкан. Анын алкагында башка райондордо да иш алып барылууда.