Turmush — Лейлек районунда унаа уурдай качкан жигит кармалды. Бул тууралуу бүгүн, 18-апрелде Баткен ОИИБдин басма сөз кызматы кабарлады.

Маалыматка караганда, милицияга Лейлек аймагынын тургуну 50 жаштагы тургуну К.А. кайрылган. Ал «Хендай Портер» үлгүсүндөгү унаасын белгисиз адамдар уурдап кеткенин билдирген. Бул факты Кылмыш жаза кодексинин 211-беренеси (автомототранспорт каражаттарын айдап качуу) менен катталып, кылмыш иши козголгон. Лейлек РИИБдин иликтөө иштеринин жүрүшүндө кылмышка шектүү жигит Сүлүктү шаарында изин жашырып жүргөн жеринен аныкталып кармалды. Ал Лейлек районунун Ак-Суу айыл аймагында убактылуу жашаган Чүй облусунун Сокулук районунун 27 жаштагы Р.С. аттуу тургуну болуп чыкты. Азыркы күндө тергөө иштери жүрүп жатат.