Turmush — Кечээ, 23- апрель күнү Талас облусунун 2 районунда жүргөн селдин кесепеттери такталып жатат. Бул тууралуу ӨКМден кабарлашты.

Маалыматка караганда, учурда облус аймагында абал тынч. Сутка ичинде 4 сел каптоо кырсыгы катталды. Жабыр тарткан адам жок. Айтматов районунун Арчагул айылында, Талас районунун Кара-Суу, Көк-Кашат, Ак-Жар айылдарында сел жүрдү. Учурда жарандык коргонуу комиссиясы жеринде селдин кесепеттерин такташууда.

• Буга чейин Талас районунун аймагында катуу жааган жаандан катталган селдин кесепеттерин жоюу үчүн район аймагына өзгөчө кырдаал режими киргизилген болчу.

Окуя тууралуу:

Кечээ, 22-апрелде Талас районунда катуу жааган жаандан улам айылдарда кыян жүргөнү кабарланган.

Маалым болгондой, Талас шаардык №17 ӨКБга саат 18:57де Талас районунун Кең-Кол айылындагы Семетей көчөсүндө үйлөрдү сел суулары каптап жатат деген маалымат түшкөн. Жерине 5 куткаруучу тартылган.

Ошондой эле, саат 17:50 чамасында Талас районунун Чоң-Алыш айыл аймагынын Кара-Суу айылынын күн батыш тарабында талаадан түшкөн сел Талас—Тараз—Суусамыр автоунаа жолун каптаган. Жерине Талас району боюнча ӨКБнын башчысы Э.Курмарбаев жана 3 куткаруучу топ, айыл өкмөттүн кызматкерлери чыгышкан.

Саат 17:56 чамасында Талас районунун Беш-Таш айыл аймагынын Көк-Кашат айылынын ички көчөлөрүн талаадан түшкөн сел каптаган. Жерине Талас району боюнча №101 ӨКБнын башчысы Э.Курманбаев, 3 куткаруучу топ, айыл өкмөттүн кызматкерлери чыгышкан.

Талас районунун Долоно айыл аймагынын Ак-Жар айылынын ички көчөлөрүн сел суулары каптаган.