Turmush — Нарын облусунун Ат-Башы районундагы Босого жайлоосунда Казыбек казалчынын 120 жылдыгы белгиленди. Бул тууралуу аймактык кабарчы билдирди.

Маалыматка караганда, бул иш-чарага республиканын бардык аймагынан атайын меймандар келишкен. Анда кыргыз эстрада ырчыларынын гала концерти, акындардын Казыбек казалчынын даңазаланган ырлары жаңырып, спорттук иш-чаралар, улуттук буюмдардын жана улуттук тамак-аштардын көргөзмөсү уюшулуп, кыргыздын боз үйлөрү катары менен тигилди. Мындай саамалыктар ушул жылдын аягына чейин уланып, республикалык алкакта дагы иш-чаралар өткөрүлөрү айтылды. Мааракеде өткөрүлгөн улуттук даамдардын, көл өнөрчүлөрдүн, боз үйлөр сынагынын жеңүүчүлөрүнө сыйлык тапшырды.

Сынакка катышкандардын кол эмгектери атайын түзүлгөн комиссиянын кароосунан өтүп, 1-2-3-орундар ыйгарылды. Алсак улуттук тамак-аштардын жана кол өнөрчүлөрдүн сынагынын жеңүүчүлөрүнө орундарга жараша 3 миңден 7 миң сомго чейинки сыйлыктар берилди. Ал эми «Жасалгалуу боз үй» сынагына катышкан 17 боз үйдүн ичинен төртөө тандалып алынды. Алгачкы 3 орунга 7 миңден 10 миң сомго чейин, ал эми баш байгеге Ат-Башы райондук билим берүү бөлүмү ээ болуп, 50 миң сом сыйлыкка татышты. Ошондой эле акчалай сыйлыктар улуттук спорттук оюндардын жеңүүчүлөрүнө дагы берилди.