Turmush — Бүгүн, 6-июлда эртең менен Жалал-Абад шаарында унаа кырсык катталды. Бул тууралуу жергиликтүү тургундар билдиришти.

Маалыматка караганда, эртең менен эл ташуучу 2 маршруттук унаа кагышып, бири коомдук тамактануучу жайдын имаратын сүзүп токтогон.

Жалал-Абад областтык биргелешкен оорукана жетекчилиги андагы жол кырсыгынан улам 24 адам кайрылганын ырастады.

«Биздин ооруканага 24 адам кайрылып, 16сы ооруканага жаткырылды. Кырсыктан жабыркагандардын бирине операция жасалды. Оор абалдагылары, 2 буту, колу сынгандары бар. Жабырлануучулардын жагдайлары ар кандай», — деп айтылат маалыматта.

Ал эми Жалал-Абад ОИИБнин жол кыймылынын коопсуздугун көзөмөлдөө бөлүмүнөн алынган маалыматка караганда, калаадагы Б. Осмонов көчөсү менен А.Шерматова көчөсүнүн кесилишинде «Мерседец-Бенц Спринтер» унаалары кагышкан. Экөөнүн тең айдоочулары Сузак районунун тургундары болушкан. Бул кырсыктын кесепетинен Сузак районунун Кызыл-Сеңир айылынын 2 тургуну травматология бөлүмүнө жаткырылган. Жоон-Күнгөй айылынын тургуну хирургия, нейрохирургияга жаткырылган. С.Б. аттуу адамдын ички органдарынын жабыр тартып алган жаракатынан улам ооруканага жаткырылган. Мундуз айылынын тургуну Р.Ж., Ак-Баш айылынын тургуну А.У. реанимацияга жаткырылган.

Бул кырсык боюнча тиешелүү иштер жүрүп жатат.