Turmush — Жалал-Абад облусунун Сузак районунда бейбаштыкка шектелип, издөөдө жүргөн жарандар кармалды. Бул тууралуу Жалал-Абад ОИИБдин басма сөз кызматы билдирди.

Маалыматка караганда, Сузак райондук ички иштер бөлүмүнө Кызыл-Туу айыл аймагынын 48 жаштагы тургуну арыз менен кайрылган. Анда 2023-жылдын 3-февраль күнү саат 16:00 чамасында Сузак районунун Мундуз айылында жайгашкан мал базарда 2 бир тууганын жана өзүн сырттан тааныш болгон Абдулла, Абдыкалык, Абдумалик, Иса жана аттары белгисиз болгон 3 шериги менен сабап, көзүнө таш менен уруп койгондугун билдирген. Анын кесепетинен жаракат алып, Жалал-Абад облустук ооруканасына жаткырылышкан.

Бул окуя боюнча топтолгон материалдар Сузак РИИБдин Кылмыштардын бирдиктүү реестрине Кылмыш-жаза кодексинин 280-беренеси (бейбаштык) менен катталып, кылмыш иши козголгон.

Бул кылмыш иши боюнча 2023-жылдын 4-февралында Сузак районунун Таш-Булак айыл аймагынын тургуну — 1994-жылы Т.А. кармалып, Сузак РИИБдин убактылуу кармоочу жайына бир айга киргизилген.

Мындан сырткары милиция тарабынан бул окуяга шектелген 6 жарандын өздүктөрү такталган. Бирок тергөөнүн жүрүшүндө алар жүргөн жерлерин жашырып, тергөөгө келбей, белгисиз болуп жаткандыгына байланыштуу алрага карата издөө жарыяланган жана сырттан айыптары угузулуп, камакка алуу түрү тандалган.

23-февраль күнү аталган кылмыш ишин жасагандыгы боюнча айыпталып, издөөдө жүргөн Сузак районунун тургуну — 1995-жылы туулган А.у.М. кармалып, 26-февралда анын бөгөт коюу чарасы катары Сузак райондук сотунун тергөө судьясы тарабынан 2 айлык мөөнөткө үй камак түрү тандалган.

Ошондой эле Сузак РИИБдин кылмыш иликтөө бөлүмчөсүнүн ыкчам кызмактерлери тарабынан жүргүзүлгөн ыкчам иликтөө иштеринин натыйжасында аталган кылмыш иши боюнча айыпталып, издөөдө жүргөн 1984-жылы туулган С.А., 1989-жылы туулган С.Б. жана 1990-жылы туулган А.А. кармалып, Сузак РИИБдин убактылуу кармоочу жайына киргизилди.

Учурда тергөө амалдары улантылып жатат.