Turmush — Нарын облусунда саламаттыкты сактоо тармагында милдеттүү медициналык камсыздоодон өткөн жарандарды жеңилдетилген дары-дармектер менен камсыз кылууда рецептер калкка толугу менен жазылып берилбей, 687 миң сомдук дары-дармек колдонулбай калган. Бул тууралуу облустагы жыл жыйынтыгын чыгарган коллегияда айтылды.

Жыйында облустун 2022-жылдагы социалдык-экономикалык өнүгүүсүнүн жыйынтыктарына баа берилип, 2023-жылга милдеттер белгиленди.

Коллегияда 2 эненин, 1 жашка чейинки 53 баланын өлүм көрсөткүчү катталганы сыяктуу кемчиликтер ортого салынды.

Министрлер кабинетинин төрагасы Адылбек Касымалиев саламаттыкты сактоо тармагындагы кадрлардын жетишсиздик маселесинде 3-4-курстун студенттерин тартуу жагын карап көрүүнү сунуштады. Ошондой эле дары-дармектерди сатып алууда борборлоштурулган тендер жарыялоо натыйжалуу болорун айтып, бул маселени чечүүгө өзү киришерин билдирди.