Хадис:
«Ким мага бир жолу салават айтса, Алла Таала ага он жолу салават айтат.
Ошондой эле анын он катачылыгы өчүрүлүп, он даражага жогорулайт»
(Насаий, Сахв, 55).
«Кыямат күнү адамдардын арасынан мага эң жакын боло тургандар –
булар мага эң көп салават айткандар болот!» (Тирмизий, Витр, 21).
Аллахтын элчиси (саллаллооху алайхи ва саллам)ды сүйүүнүн белгилери♥
Аллахтын элчиси (саллаллооху алайхи ва саллам)ды сүйүү ыймандан, биз үчүн важиб болуп саналат. Пайгамбарыбыз (саллаллооху алайхи ва саллам) азирети Умардын:
“Эй, Аллахтын элчиси! Мен сени напсимден башка бардык нерседен артык көрүп, сүйөмүн” деген сөзүнө:
“Эй, Умар, мени напсиңден да артык көрүп сүймөйүнчө, ыйман келтирген адам болуп эсептелбейсиң” деген. Муну уккан азирети Умар:
“Азыр сени өзүмөн да артык көрүп, жактырамын” деп айткан.
Албетте кур эле жактыруу эч нерсеге татыбайт. Жүрөк менен сүйүп, тил менен айтып, кылган иш-аракеттер аркылуу сүйүүнү билдирүү керек. Сүйүүнүн кээ бир белгилери болот. Пайгамбарыбыз (саллаллооху алайхи ва саллам)ды сүйүүнүн жышаандарына ээ болууну каалабайбызбы, албетте каалайбыз. Дал ошол белгилердин бир канчасы төмөнкүлөр:
1. Аны тез-тезден эстеп туруу
Баарыбызга белгилүү болгондой адам жактырган адамынын атын кайра-кайра айтып, аны эстөөдөн ырахат алат. Жакшы көргөн адамдардын атын тоого, ташка, дубалга, даракка, бактарга жазуу менен жүрөгүндөгү ашыктык сезимин билдирет. Адам жактырбаган адамдын атын дагы атагысы келбейт.
2. Ага салават айтуу
Бир хадисте Аллахтын элчиси (саллааллооху алайхи ва саллам):
“Аллахтын ээн-эркин кыдырып жүрүүчү периштелери бар, алар мага салават айткан адамдардын саламдарын айтып келишет (жеткиришет), мен болсо бир саламга он салам кылып жооп берем” деп айткан. Албетте пайгамбарыбыз (саллааллооху алайхи ва саллам) биздин саламыбызга муктаж эмес, тескерисинче, биз ага муктажбыз, ал саламдар бизди кечирүүнүн башаты болуп саналат. Ошондуктан, салават айткан адам ибадат кылуу чөйрөсүнө кирген болот.
3. Анын сүннөтү менен жүрүү
Аллахтын элчиси (саллаллооху алайхи ва саллам)дын жолу менен жүрүү, Аллахты сүйүүнүн жышааны экендиги Куранда берилген. “Айт, ээ, Мухаммед, эгер силер Аллахты сүйсөңөр, анда мени ээрчигиле. Ошондо Аллах силерди сүйөт жана күнөөңөрдү кечирет. Аллах – Кечиримдүү, Боорукер” (Али Имран сүрөсү, 31-аят).
Пайгамбарыбыз (саллаллооху алайхи ва саллам) бардык сүннөттөрүн аткаруу мүмкүн эмес, бирок сөзсүз аткара турган сүннөттөрү да бар. Ансыз деле коомдо да ал кыймыл-аракеттерди аткаруубуз абзел. Бул кыймыл-аракеттерди сүннөткө айландыруунун жолу пайгамбарыбыз Мухаммадды ойлоо менен ишке ашат. Мисалы, “бисмиллах” деп айтуу менен ордунан туруу, “бисмиллах” деп айтуу менен тамактанууга киришүү, кийинип жатканда оң тараптан баштоо жана уктаарда оң тарап менен жатуу баарыбыз эле аткара ала турган амалдарга кирет. “Аллахтын элчиси (саллааллооху алайхи ва саллам) мындай кылат эле” деп, ал кыймыл-аракеттерди көп кылуу аркылуу сүннөткө айландыра алабыз.
4. Көп-көп хадис окуу
Диндин негизи жана Ислам дининин экинчи булагы болгон хадистерди көп окуу, түшүнүү жана иш жүзүнө колдонуу менен гана чыныгы адам болуу мүмкүн. Хадистер адам баласынын аң-сезимин өркүндөтүп, Аллахтын элчиси (саллааллооху алайхи ва саллам)ды жакшылап таануу мүмкүнчүлүгүн берет. Аллахтын элчиси (саллааллооху алайхи ва саллам)ды жакшылап таануу менен гана Аны сүйүү мүмкүн болот. Вахийдин (Алланын аяндарынын) көзөмөлүндө айтылган хадистер ар бир учур жана ар бир муктаждыкка жооп берүү менен бирге Куранды туура түшүнүүгө өбөк болууда. Хадисти окуп үйрөнүп башка адамдарга жеткизгендер үчүн Пайгамбарыбыз (саллааллооху алайхи ва саллам)дын: “Менден бир хадисти угуп, эстеп калгандан кийин, ал хадисти укканындай кылып башка адамга жеткизген адамдын бетин Аллах нурландырсын” (Абу Дауд) деген дуба тилеги бар.
5. Анын адеп-ахлагы менен ахлактануу
Тактап айтканда, сабыр, жоомарттык, сөзгө туруучулук, кечиримдүүлүк, ырайымдуулук, боорукердик, жөнөкөйлүк жана адилеттүүлүк менен адамдарга Аллахтын элчиси (саллааллооху алайхи ва саллам) сыяктуу мамиле кылуу менен аны сүйүү.
Алтынчы сыр:
Эй чексиз алсыздык менен чексиз жардылыкта тоголонуп бараткан бечара инсан!
Ырайымдын кандай гана баалуу бир себепчи жана кандай гана кабыл болунган шапаатчы экенин мына мындан билип ал:
Ал ырайым – жылдыздар менен атомдор бирге укмуштуудай тартип жана баш ийүү менен кошуунунда чогуу кызмат кылып жатышкан Айбаттуу Падышага жетүүгө себеп болот. Жана ошол Айбаттуу, Эзелтеден баштап Түбөлүктүү Падышанын эч кимге жана эч нерсеге муктаждыгы жок. Толук беймуктаждык ичинде. Эч бир жагынан ааламга жана жаратылган нерселерге муктаждыгы болбогон Ганий-и Алал-ытлак (Чыныгы байлык Ээси). Бүткүл аалам буйругу астында, башкаруусунда, айбаты менен улуулугу астында толук баш ийүү менен Айбатына чөгөлөшөт.
Мына, эй инсан! Ырайым сени ошо эч нерсеге муктаж болбогон жана Түбөлүктүү Падышанын алдына чыгарат, Ага дос кылат, Ага маектеш кылат жана сүйүктүү пендесине айлантат. Бирок, Күндүн жарыгы Күндүн чагылуусун сенин күзгүң аркылуу сенин колуңа берип турса да, сен Күнгө жете албайсың, анткени өтө узаксың, эч качан ага жакындай да албайсын. Дал ошол сыяктуу, Аллах Таалага, Эзелтеден баштап Түбөлүккө чейин нурун чачып келаткан Жаратуучубузга биз чынында абдан алыспыз, жете албайбыз. Бирок Анын Ырайым нуру Аны бизге жакындатууда.
Мына, эй инсан! Бул ырайымды тапкан түбөлүктүү түгөнбөс Нур казынасын тапкан болот. Ал казынаны табуунун чарасы:
Ырайымдун эң жаркыраган мисалы, өкүлү, ошол ырайымдын эң чечен тили болгон жана «Рахматал-лил ааламиин» наамы менен Куранда айтылган Расул Акрам Алейхиссалаату Вассаламдын сүннөтү жана ага баш ийүү болуп эсептелет. Ал эми ушул «Рахматал-лил ааламиин» болгон денелешкен ырайымга жетүүнүн себеби болсо – салават айтуу. Ооба, салаваттын мааниси да ырайым. Мына ошол денелешкен жандуу ырайымга ырайым дубасы болгон салават болсо, ошо «Рахматал-лил ааламиин»ге жетүүгө себепчи болот. Андай болсо сен салаватты өзүңө ошо «Рахматал-лил ааламиин»ге себепчи кыл жана ал затты да Мээримдүүнүн ырайымына жетүүгө себепчи кылып ал. Бардык үммөттүн «Рахматал-лил ааламиин» болгон Алейхиссалаату Вассалам үчүн чексиз салават айтуулары, ырайымдын кандай баалуу Аллахтын белеги жана кандай гана кенен чөйрөсү бар болгондугун жаркыраган түрдө далилдеп турат.
Корутунду: Ырайым казынасынын эң баалуу бриллианты жана дарбазачысы Мухаммад Алейхиссалаату Вассалам болгону сыяктуу, эң биринчи ачкычы да: «Бисмиллахир-рахманир-рахим» болуп саналат. Ал эми анын эң оңой ачкычы да салават болуп эсептелет.
اَللّٰهُمَّ بِحَقِّ اَسْرَارِ بِسْمِ اللّٰهِ الرَحْمٰنِ الرَّحِيمِ صَلِّ وَ سَلِّمْ عَلَى مَنْ اَرْسَلْتَهُ رَحْمَةً لِلْعَالَمِينَ كَمَا يَلِيقُ كَمَا يَلِيقُ بِرَحْمَتِكَ وَ بِحُرْمَتِهِ وَ عَلَى اٰلِهِ وَ اَصْحَابِهِ اَجْمَعِينَ وَ ارْحَمْنَا رَحْمَةً تُغْنِينَا بِهَا عَنْ رَحْمَةِ مَنْ سِوَاكَ مِنْ خَلْقِكَ اٰمِينَ
