Turmush — 38 жаштагы жаратылышты сүйүүчү Саера Маматова токой ичинде күтүүсүз табылга тапты.

Анын айтымында, күйгөн дүмүрдө 15 даана тооктун жумурткасы болгон.

«Жамгырдан кийин козу карын издеп, Бишкек—Токмок унаа жолунун боюндагы токой тилкесин текшерүүгө бардым. Күтүлбөгөн жерден күйгөн дүмүрдөн жумурткаларды таап алдым. Аларды кылдаттык менен карап чыгып, жумурткалар тооктуку экенине ынандым. Ошентип жумурткалардын баарын үйгө алып келдим», — деди ал.

Бул көрүнүш боюнча фермер Арсен Тыналиев төмөнкүлөргө токтолду.

«Үй тоокторунун жүрүм-турумунда таң калыштуу эч нерсе жок. Болгону кээ бир жумурткалоочу тооктордун ата-энелик инстинкти башка тоокторго караганда күчтүүрөөк болгондуктан, алар жумурткаларын ээн, кожоюндары жетпеген жерге тууйт. Айрыкча, тооктор кушканада эмес, эркин жайлоодо багылса, мындай көрүнүш көп болот», — деди ал.