Turmush — Баткен облусунун Сүлүктү шаарында турак үйдөн өрт чыкты. Бул тууралуу ӨКМдин басма сөз кызматы билдирди.

Маалыматка караганда, бүгүн, 6-январь күнү Сүлүктү шаарында турак үйдөн өрт чыккандыгы тууралуу маалымат түшкөн. Ошол замат саат 01:17де 1 күжүрмөн эсеп, ал эми саат 01:35те 2-күжүрмөн эсеп №52 өрткө каршы куткаруу бөлүгүнөн тартылган.

Кошумча күч катары саат 02:05те Раззаков шаарындагы №74 өрткө каршы куткаруу бөлүгүнөн 4 өрт-өчүрүүчү куткаруучу чыгып, саат 02:30да жетишкен. Натыйжада саат 02:47де чектөөгө алынган жалын саат 03:17де толугу менен өчүрүлдү.

Тилсиз жоонун жалпы ээлеген аянты 300 чарчы метрге чейин жеткен. Бактыга жараша адам өмүрүнө коркунуч жаралган эмес.

Учурда материалдык чыгым жана өрттүн чыгуу себеби такталууда.