Бутту жаман жыттан жана грибоктон сактайм десеңиз…
Жайкы ысык мезгилде буту тердебеген, күндө самындап жууса деле болбой жыттанып, алтургай грибок басып, андан арыла албай жүдөп жүргөндөр оголе көп. Эзелтеден келе жаткан элдик ыкманы колдонуу менен буттун терчилдигинен, жагымсыз жыттан жана буттагы грибоктон арылууга болот.
***
2 литр кайнак сууга 100 грамм ири жалбырактуу кара чайды демдөө керек. Анан ага жылуу калыбында бутту салып отурат. Мындай максатта чайды тундурбай чамасы менен колдонуу керек, анткени чайдын терчилдикке каршы касиети дал ошол жалбырактарында.
***
Дагы бир элдик ыкма 1 чай кашык картошка же жүгөрү крахмалын ошончо өлчөмдөгү сода жана оливка майына аралаштырып, аны түн ичинде таза бутка сүртүп алуу да жакшы натыйжа берип, бутту жаман жыттан жана грибоктон арылтат.
***
Кофени да буттун терин азайтуу максатында колдонуп жүрүшөт. Аябай коюу демделген кофени дагарага куюп, ысык учурунда ага бутту салып отуруу керек. Кофе муздаганга чейин отуруп, бул ыкманы жумасына үч жолу жасап турганда натыйжалуу болот.
***
Жаңы же кургатылган ит уйгактын үстүнө кайнак сууну куюп, идиштин капкагын жаап бир саатка жакын демдеп коюу керек. Пайда болгон маңызды дагарадагы сууга кошуп, ага бир нече мүнөт бутту салып отуруу сунуш кылынат. Мындай ыкма буттун терин азайтат, демек, бара-бара жыты да жоголот.
Ошондой эле төмөнкү кеңештерди да көңүлүңүзгө түйүп алыңыз:
— Бут кийимиңиздин ичине маал-маалы менен уксустан сүртүп, кургатып туруңуз;
— Тамандарыңызга, манжаларыңыздын арасына лимондун кесимин сүртүп, таза байпак кийип алыңыз.
