……….6-БӨЛҮМ……
Клубтун ичи караңгы болгондуктан жигиттин өңүн деле дурус көргөн жокмун. Жай бий башталганда колдорум мага баш бербей анын мойнуна асылды. Жыты ушунчалык баш айлантып турду, мен масмын масмын да. Мага баарыбир тегеренип шумдук бийледик кийин болсо ал мени унаасына салып үйгө жеткирмей болгон. Жолдон дагы бир ичимдик ичкенбиз, эртеси бейтааныш жактан ойгондум.
—Мен кайдамын? Сен кимсиң?
—Мен Рыспекмин таанышканыма кубанычтамын Клара.
—Атымды кайдан билесиң?
—Кече бийлеп жатып Кларамын дегенсиң.
—Туууй эстедим, башым ий сынат азыр. Балам эмне болду экен, апама көнбөй кыйнады окшойт. Адрести айтчы машина чакырайын.
—Өзүм эле жеткирем Клара кам санаба, азыр тур анан тамактанабыз андан кийин жеткирем.
—Жиндисиңби эмне сага жаш баламынбы, жеткиргенин милдет кылып. Мага жакшы көрүнбөчү э андай жерге жакшылар барбайт экенин билем мыкты..
—Билем дечи демек сен дагы жамандарга киресиңби?
—Мен, мен….
Бирөөнү беттен алганы алып алып ыңгайсызданып кеттим. Биринчи жолу эркеке өчөшүп мындай жайга барганымды буга кантип түшүндүрөм? Эми ушул бейтаанышка актанамбы э? Эх тилим ай дайым азабын тартам.
—Билдим актанба.
—Эмнени билдиң?
—Мындай жайга биринчи жолу келгениңди, негизи үй-бүлөөң бар экенин түз жолдо экениңди..
—Чын элеби, кайдан билдиң.?
Түз оюмда ишенип алыптырмын, чын жүрөктөн чыккан сөз окшойт деген элем, адашыптырмын. Бул көрсө какшып жаткан тура.
—Ха эй кыз жаман айтып жакшы жок дейт. Көчөлөп жүрөсүңөр да кийин алдандым, алдады дейсиңер. Көчөгө чыкпасаңар силерди ким алдайт айтчы? Сен ойлобо ортобузда эчнерсе болгон жок, сендейлерди тебеленди болбосун деп алып келип турам үйгө. Силер тууралу баардыгын билем, акыл айтсаң эле биринчи жолу чыгып жатам, андай болду, мындай болду дейсиңер. Ойлончу эртерек силер энесиңер, бүлөөсүңөр, эркектин намысы болосуңар. Ар бир кызды көргөндө өз карындашымдай карайм, бузулуп кетишсе менин намысым тебеленгендей болот. Эми айтып койоюн эми көчөдөн көрсөм алып келбейм бузуласың, элестет өзүнөн жийиркенген кандай азап.
—-Мага акыл үйрөтпөчү, менин жашоом тууралу эмне билет элең сен. Оозуңду жапчы, жап..
—Чыгып кет..
Кийимимди алып чыгып кеттим, жолдо ырдап бара жаттым. Эмнегедир бул сөздөргө териккен жокмун, кубантты десем жаңылышпайм. Мен эркектин жинин ушунча келтиргениме таң калып турдум. Үйгө келсем кайненемдин көздөрү кызарып калыптыр. Түнү менен уктабаганы анык. Үйгө кирип кеттим апам унчукпады. Мен аны билем да өзүмдүн апама окшоп беттен алып аңкылдабай акырын олтурганда эле тамырын тартып, сөздү келиштире айтаарын. Сай сөөгүңө жетип бир жыл уялып жүргүдөй кылат. Ал күнү унчуккан жок, заар сөз күтүп айлам кетти. Кечинде чай ичип алып жатып калдык. Жаздыка баш койгондон соң уйку келсе кана эле, жарашыктуу чырай менен теректей тик, сымбаттуу бала мени кош көңүл калтырбады. Мына Эрболдун жоголгонуна быйыл бешинчи жыл баратат. Эркек жыты, эркектин койну, камкордугу, эрдиги кандай болот экенин унутуп кеткендеймин. Ашканага түшүп суу ичтим, оюмду санаа алып койгон экен акыры түн ортосунда Рыспекти көздөй жөнөдүм. Кечирим сурайын деген ой болчу. Эшигин кактым, уйку көздөрү менен чыкты эле акырын кучактап кечирим сурап артка бурулдум.
—Клара ошол үчүн түндө келдиңби?
—Ооба уктай албай койдум да, мен туура эмес кылдым окшойт.
—Кир үйгө чай берүүгө жарайм жок дегенде.
Кече эле мас абалымда кирсем бүгүн өз ыктыярым менен босого аттадым. Ушундан кийин экөөбүз тез-тезден жолугуп баштадык. Өзүмдү ушунчалык сүйүүгө туруксуз экенимди билип калдым. Жашоо өзүмө жагып баштады, күлкү, жылмайууну эчак унуткан ууртум эми болсо кубануусун койбой калды. Кайра сүйүп калдым, кайненем менен балам анча ойлондурган жок мени. Себеби кайненем жашаган үй балама калса баламды ата-энем деле багып бермек же багып алмак. Ачык эле Рыспек менен колтукташып басып калдым, кайненемдин көзүнөн жашы басылбай калды. Күндөрдүн биринде чыдабай калды окшойт.
—Клара кызым келчи бери, экөөбүз сүйлөшөлүчү. Сага айтчу сөздөрүм көп, көптөн бери убагы келгенде деп жүрүп кечигип калдымбы деп коркуп жатам.
—Эмнени айтасыз апа? Мен шашып жатам батырак айтасызбы.
—Мейли анда барып келгенден соң айтам шашпай, беш мүнөттүк сөз эмес бул. Кызым абайласаңчы..
—Ий маакул апа жакшы олтургула, Жакшылыкты тойгузуп койдум, сизге тамак салдым курсак тойгузуп алыңыз.
—Клара кайда баратасың?
—Айттым эле го жумушка орноштум деп, унуттуңузбу?
—Иши кылып күйөөң келгиче бир аз чыдап турсаң болду кызым, бизди багам!-деп кыйналбай..
Эми канттим Эрболду өлүкө же эч качан кайтпас адамга чыгарып салган турбаймынбы. Эрболдун качандыр бир күнү кайтып келишин ойлогон жок экенминго. Кайненемдин акылдуулугун карап кой, күйөөң келгиче этегиңди жый деп койду го сылык эле. Кой эсим барда чын эле этегимди жыйайын. Бүгүн барып Рыспек менен сүйлөшүп баардыгын бүтүрүп келейин.
Рыспек Таластан болот, үйдө жалгыз уул эки эжекеси бар. Эжекелери кызматтагы кишилердин токолдору экен. Эң кызыктуусу чоң эжеси сиңдисин күйөөсүнүн досуна токол кылып өзү алып бериптир. Эл көзүнө эле сыйламыш этпесе Рыспек эжелерин аябай жаман көрөт экен. Атасы менен тең кишилерге токол болуп, үй-бүлөөсүнүн намысы менен ойногон эжелерин үйгө келбегиле деген экен. Атасы да кыздарын кабыл албайт экен, байкуш эне баардыгына түтөт эмеспи кыздары менен көчөдө жашынып жолугушууга аргасыз тура. Рыспек экөөбүз алдыга максат койгон эмеспиз, келечек биз үчүн бүдөмүк. Бүгүнкү күн менен жашап келебиз бирок, эжелерин кечкен атасы никедеги балалуу аялды эрчитип барса Рыспектен да кечүүсү анык.
—Рыспек бүгүн акыркы жолу келдим, эми жолубуз эки башка болуусу керек. Сени менен жүрүп күйөөм, балам бар экенин унутуптурмун. Мени кудай кечиреби.
—Клара антип айтпачы, ал сени таштап кетти, баласы төрөлгөндө да басып келген жок. Ошону кантип бүлөөм деп жатасың? Мен сени сүйөм, экөөбүз үйлөнөлү бактылуу болобуз.
—Рыспек күйөөсүнүн көзүнө бир ирет чөп салган аял экинчи ирет мындай кылбайт деп айта аласыңбы? Мага ишенбе мен андай ишенич деген ыйык нерсеге арзыбайм. Кетчи, мени кой берчи.
—Анын себеби болгон, ал сени таштап кетти. Мен болсом жаныңдан жарым карыш чыкпай, алаканга салат элем. Мага бир мүмкүнчүлүк берчи, баардыгын сен чечесиң.
—Болбойт, болбойт кет, кет бар..
Рыспектин үйүнөн чыгып өз үйүмө бараттым, артка кайткым келди. Сүйгөнүмдүн жанынан чыккым келбей жатты бирок, башка арга жок болчу. Рыспек мен көрүнбөй калгычам карап турду. Акыры чыдабады окшойт башын мыкчып тизелеп олтуруп калды. Эркек көз жашын төксө жаман экен.
Үйгө келип бөлмөмө көтөрүлдүм, жаздык кучактап үнсүз ыйлап жаттым. Мени ким түшүнөт? Ким көрсө бул бузулган аял, намыссыз, жалжеке дейт да. Чындыгында мен деген темир эмесмин, менде да көңүл, жүрөк бар. Тирүү адаммын менде да каалоо бар. Балким бирөө каргайт бирөө сөгөт мен аларга унчукпайм, жооп кайтарбайм. Себеби алар менин бут кийимимди кийсе туруштук бере албаса керек. Эчак эле кара жерди кучактап жаткан болмок. Мейли, мейличи баарына ыраазымын. Үч күндөй мага таң атпай койду, жарык бөлмөм күңүрт көрүнүп кыйналып кеттим. Бул акыбалымды көргөн кайненем акыры жаныма келип сөз баштады.
—Кызым сен мынчалык өзүңдү кыйнаба. Балам белгисиз кетти дегенде да дал ушундай акыбалда төрт жыл жаттың. Мен дагы жаш болгонмун баардыгын түшүнөм. Бешоогур кайнатаң мени ала качып алган, өзүмдүн сүйгөнүм бар эле ал кезде. Айласыз калып калганмын бирок, ал балага деген сезимим таакыр өчпөй койду. Сагыныч кыйнап аны издечү болгом. Ал кезде Эрбол эки жашка толуп калган эле, сүйгөнүмдү капыстан жолугуп калып кезигип баштадык. Баардыгы эсимден чыкты, көзүмө эчким, эчнерсе көрүнбөй калды. Артты карабай кетмек болгонумда кайненем бир жаман сөз айтпастан Эрболумдун келечеги мен таштап кетсем кандай болоорун айтып берди. Анан кийин айласыз баардыгын жыйноого бел байладым. Кандайдыр убактан соң боюмда бар экенин билдим, кайненем алдырасың деди. Себеби Калил ал убакта башка жакта иштеп жүргөн эле. Шерменде болбоюн деп дароо көндүм. Ал кезде медицина өнүккөн эмес ичимдегин тамдан секирип, бутумду ыссык сууга салып, даары ичип түшүрдүм. Ошондон кийин оорукчан болуп калбадымбы. Төрөбөй жалгыз Эрбол менен калдым, айла жок. Мына мен жөнүндө чындыкты уктуң. Эми мени ук, бир сөз менен баардыгын түшүнүп жыйнаштырганың туура болду. Сенден бир нерсени жашырып келгенбиз. Эрбол түрмөдө, ошол күнү сага тез жардам жиберип коюп мага келди.
Уландысы бар
