Аялзаты атырды кандай максатта колдонушу керек? Анас бин Малик аттуу сахабанын айтуусунда ардактуу Пайгамбарыбыз (саллаллаху алейхи васаллам) мындай деген: «Бул дүйнөдө мага үч нерсе сүйдүрүлдү: аял, жагымдуу жыт жана көзүмдүн нуру болгон намаз» (Ахмад бин Ханбал, 3/128).Дагы башка бир хадисинде: Төмөндөгү төрт нерсе Пайгамбардын сүннөтү болуп эсептелет. Алар: уялуу (ыйбаа), атыр колдонуу, тазалыкты сактоо жана үйлөнүү».Ислам дини – бул тазалыктын дини. Исламдын негизги максаты – ыпластыктан тазалануу. Ошол себептен бул жаатта аял болсун, эркек болсун баарына талап бирдей. Аял кишилерге таандык маселелерде Ислам дини өзгөчө эрежелерди койгон. Ошол эрежелердин бири – бул үйүбүздүн куту болгон аялзатынын атыр себинүү маселеси. Ачык айтып коюш керек, динибизде аялзатынын атыр себинүүсүнө тыю салынган эмес. Бирок, шарият мыйзамынын чегинен чыкпоо шарты менен.Маселен, өз үйүнүн ичинде үй-бүлө мүчөлөрүнүн алдында себинип жүрсө болот. Ал эми көчөгө чыгаарда, конокко же мечитке бараарда же бөтөн эркектер болгон жерлерге буркуратып себинип алуу башкалардын назарын өзүнө бурууга себеп болгондуктан, мындай жайларга атыр себинүүгө уруксат берилбейт. Бул жагдай напсинин тизгинин тарта албаган эркектердин ой-санаасын бузушу толук ыктымал.Пайгамбарыбыз Мухаммад (саллаллаху алейхи васаллам) бир хадисинде мындай деген: «Бир аялдын атыр себинип алып сыртка чыкканы жана адамдар билсин деп көпчүлүк болгон жерден өткөнү зинага карай кадам таштоо менен барабар» (Тирмизий, Адаб, 35) дагы бир хадисинде «Бир аял атыр себинип алган болсо, куптанда (намаз окуу үчүн) артыбызда турбасын» (Муслим, Салат, 143).