Аалымдын таңы

Имам Шафъий бир күнү багымдат намазынан кийин үйүнө кайтып баратса, жолдон бир киши салам берип, кандай таң аттырдыңыз деп сурайт. Имам Шафъий алик алып төмөндөгүдөй жооп берген экен: — Менден сегиз нерсе суралган абалда таң аттырдым!

1- Роббим менден буйруган парзын сурайт.

2- Расулуллах (соллаллоху алайхи уа саллам) менден сүннөттөрүн сурайт.

3- Үй-бүлө, бала-чакам күнүмдүк ырыскыларын сурайт.

4- Нафсим ага ээрчишимди сурайт.

5- Шайтан өзүнө алданышымды сурайт.

6- Периштелер жакшы нерселерди жаздырышымды сурайт.

7- Өткөн күндөрүм карышымды сурайт.

8- Акырында, Азраил периште өлүмгө даяр турушумду сурайт. Ушундай суроолор менен таң атырам. Ар күнү таң эрте бул суроолордун жообун табуу үчүн жөнөйм деген экен.