Turmush — Ысык-Көл облусунун Жети-Өгүз районунда вилосипед тээп бараткан өспүрүмдү сүзүп, качып кеткен айдоочу кармалды. Бул тууралуу облустук жол кыйымылынын коопсуздугун камсыздоо бөлүмүнөн билдиришти.

Маалыматка караганда, кечээ, 4-июль күнү Жети-Өгүз районунун Саруу айылынын борбордук көчөсүнөн белгисиз айдоочу өңү ак түстөгү унаасы менен ушул эле айылдын тургуну — 2009-жылы туулган С.А.У. аттуу жаш өспүрүмдү велосипед тээп бара жаткан жеринен сүзүп, окуя болгон жерден изин жашырып качып кеткен.

Бул жол кырсыгы Жети-Өгүз РИИБдин маалыматтык электрондук журналына катталып, качып кеткен айдоочуну табуу максатында ыкчам издөө иш-чаралары жүргүзүлө баштаган.

Көрүлгөн иш-чаралардын негизинде, Жети-Өгүз райондук ЖКККБнын кызматкерлери тарабынан Жети-Өгүз районунун Кызыл-Суу айылынын тургуну — 1997-жылы туулган А.У.А. аныкталып, «Ауди-С4» үлгүсүндөгү автоунаасы менен кармалган.

Автоунаа айып короого токтотулуп, айдоочу тергөө кызматына өткөрүлүп берилди.

Азыркы учурда тергөө кызматы тарабынан тиешелүү териштирүү иштери жүргүзүлүүдө.