Turmush — 1-июлда Ноокат районунда болгон унаа кырсыктан улам жандандыруу бөлүмүндө 19 жаштагы жигит 4 күндөн бери өзүнө келе элек. Бул тууралуу Ноокат райондук ооруканасынан кабарлашты.

Маалым болгондой, ал баш мээсинен катуу жаракат алган. Ооруканага жалпы 6 адам түшүп, 3 жандандыруу бөлүмүнө, 3 травмотологияга түшкөн. Жандандыруу бөлүмүнө түшкөн 3 адамдын экөө бүгүнкү күнгө палатага которулган. Бирок 2004-жылы туулган жигит өзүнө келе элек.

Окуя тууралуу:

Буга чейин 1-июлда Ноокат районундагы жол-транспорт кырсыгынан 1 адам каза болгону белгилүү болгон.

Жергиликтүү тургундардын айтымында, унаада бар жаткан жүргүнчүлөр жабыркап, Ноокат райондук ооруканасына жеткирилген.

Ал эми Ош облустук жол кыймылынын коопсуздугун камсыздоо бөлүмү Гүлистан айыл аймагынын 2004-жылы туулган тургуну Я.З. 1-июль күнү саат 16:00 чамасында Ош—Баткен—Раззаков унаа жолунун 20-чакырымында «Дэу Нексия» үлгүсүндөгү унаасы менен түштүктөн чыгышты көздөй бара жатып, рулду башкара албай, карама-каршы багытта келе жаткан «Хендай Портер» унаасы менен кагышканын кабарлаган. Аталган унааны Гүлистан айыл аймагынын 1979-жылы туулган тургуну А.И. башкарып бара жаткан.

Кырсыктын кесепетинен «Дэу Нексия» үлгүсүндөгү унаанын жүргүнчүсү, Бостон айылынын 2004-жылы туулган тургуну Т.П. окуя болгон жерде каза болгон. Ал эми айдоочусу Я.3.жүргүнчүлөрү — 2008-жылы туулган Т.А., 2003-жылы туулган А.М., 2005-жылы туулган Ж.И. жана «Хендай Портер» автоунаасынын айдоочусу И.А., жүргүнчүсү — 2008-жылы туулган М.М. жаракат алып, Ноокат аймактык ооруканасына кайрылышкан.