Turmush — Кыргыз милициясынын түзүлгөндүгүнүн 100 жылдыгына жана кызмат учурунда каза болгон кызматкерлердин урматына облус боюнча райондук ички иштер бөлүмдөрүнүн арасында волейбол оюну боюнча спорттук иш-чара болуп өттү. Бул тууралуу Ош ОИИБдин басма сөз кызматы билдирди.

Маалыматка караганда, мелдеште жалпы 8 команда ат салышты.

Спорттук оюнга Ош облусунун ички иштер башкармалыгынын жетекчилиги, жергиликтүү бийлик өкүлдөрү жана кызмат учурунда каза болгон кызматкерлердин жакын туугандары катышты.

Иш-чаранын максаты — кызмат учурунда каза болгон кызматкерлерди эскерүү, кыргыз милициясынын түзүлгөндүгүнүн 100 жылдыгын даңазалоо, өздүк курамдын арасында ынтымакты бекемдөө жана кызматкерлердин физикалык даярдыгын чыңдоо.

Спорттук иш-чарада кызматкерлер өздөрүн жогорку деңгээлдеги даярдыгын көрсөтүшүп, жыйынтыгында 1-орунга Кара-Кулжа райондук ички иштер бөлүмүнүн курама командасы, 2-орунга Өзгөн райондук ички иштер бөлүмүнүн курама командасы, 3-орунга Ноокат райондук ички иштер бөлүмүнүн курама командасы ээ болушту.

Иш-чаранын соңунда кызмат учурунда каза болгон кызматкерлердин урматына Куран окулуп, жакын туугандары иш-чараны уюштуруучуларга ыраазычылык билдиришип, каалоо-тилектерин айтышты.

Жыйынтыгында жеңүүчүлөргө башкармалыктын жетекчилиги тарабынан кубок, медаль жана кызыктыруучу белектер ыйгарылды.