Turmush — Балдарды коргоонун күнүнө карата Ош ОИИБдин жетекчилиги Кара-Суу дүлөй балдар үчүн атайын жатак типтеги бала бакчасына барып, майрамдык белектерди тапшырды. Бул тууралуу аталган түзүмдүн басма сөз кызматы кабарлады.

Маалыматка караганда, ага катар эле Кара-Суу, Араван, Өзгөн, Ноокат, Кара-Кулжа, Алай жана Чоң-Алай райондук ички иштер бөлүмдөрүнүн жетекчилиги да жер-жерлерде балдардын маанайын көтөрүп, майрамдык белектерди тапшырышты.

Кыргызстандын Улуттук статистика комитетинин маалыматына караганда, Эл аралык балдарды коргоо күнү жай мезгилинин биринчи күнүнө туш келип, дүйнө жүзү боюнча 1950-жылдан бери белгиленип келет. Бул күн балдардын укуктарын, өмүрүн жана ден соолугун коргоо керектиги жөнүндө коомго эскертүү берип турат.

2024-жылдын башына карата Кыргызстанда 18 жашка чейинки курактагы 2 миллион 692 миң бала жашап жатканы такталган. Алардын жарымынан көбүн (51,4%) эркек балдар түздү. 2023-жылдын башына салыштырмалуу балдардын саны 30 миң балага же 1,1% көбөйдү.

Үстүбүздөгү жылдын башында балдардын жалпы санынын ичинен:

41% — 7 жашка чейинки балдар (1 млн 97 миң адам);

45% — 7-14 жашка чейинки балдар (1 млн 219 миң адам);

14% — 15-17 жаштагы өспүрүмдөр (376 миң адам).

Балдардын басымдуу көпчүлүгү (70,6%) айыл жергесинде жашашат.

2023-жылы 146 миңге жакын бала төрөлгөн. Алардын ичинен дээрлик 75 миңи эркек балдар. Башкача айтканда кыздарга караганда балдар көбүрөөк төрөлгөн.