Чаткал районунда кар көчкүнүн айынан өчкөн электр жарыгы кайра калыбына келтирилди

Turmush — Кар көчкү алдында калган электр мамылар, аба чубалгылар кайрадан калыбына келтирилип, Чаткал районунун тургундарына электр жарыгы берилди. Бул тууралуу «Жалалабатэлектро» ААКтын басма сөз кызматы кабарлады.

Маалыматка ылайык, 13-мартка караган түнү Чаткал районунда кар түшүп, 3 электр мамы көчкү алдында калган. 13-март күнү Чаткал район электр тармактар ишканасынын бардык кызматкерлери авариялык өчүүлөрдү калыбына келтирүү үчүн дароо борбордук фидерин жандырууга киришкен. 10 кВ жогорку чыңалуудагы аба чубалгысын ишке берип, 9 ТПны кошуп, 850 абонентти электр энергиясы менен камсыз кылууга жетишкен.

«Ала-Бука район электр тармактары ишканасынан 8 электр монтер, 2 атайын техника (манипулятор, УАЗ) кошумча жардамга жөнөдү. Бирок, Чапчыма ашуусундагы кар көчкүнүн кайталанышы, жолдун жабылышы кошумча күчтү артка кайтарууга мажбур кылды. Ага карабастан түнү менен жолдун ачылышын күтүп, 15-мартта таңкы саат төрттө Чаткал жергесине барышты. Кар көчкү астында калган 3 электр мамыны калтырып, жанынан өткөн фидерге 8 электр мамы орнотушту. Бул жумуштар түнкү саат 22:00гө чейин жүрдү.

2-бригада Айгыр-Жал айылындагы электр мамычаларды калыбына келтирсе, 3-бригада тоо аралап, кар кечип, Ак-Таш айылына чейинки электр зымдарын текшерүүгө алып, иреттеп, айылга чейин электр жарыгын берди. Айыл өкмөттүн техникасы жардамга келди. Бүгүн, 16-мартта жаңы орнотулган 8 электр мамыга аба чубалгыларды тартуу (монтаждоо) иштери аягына чыгайын деп калды. Кечке чейин Кайың-Суу жана Айгыр-Жал айылдарына электр энергиясы берилет», — деп айтылатта маалыматта.