Чүйдө дайынсыз болуп жаткан 73 жаштагы тургундун денеси камыштардын арасынан табылды

Turmush — Чүй районуна караштуу Пригородное айылында бир апта мурун жоголгон 73 жаштагы тургуну Сабира Бейшеналиеванын жансыз денеси табылды. Бул тууралуу анын жакындары билдиришти.

Алардын айтымында, дайынсыз жоголгон аял 21-сентябрь күнү Чүй районунун Пригородное айылынан табылган.

«Денени камыштардын арасынан табышты. Сууга чөгүп кеткен экен», — дешти туугандары.

Буга чейин Turmush Сабира Бейшеналиеванын дайынсыз жоголуп жатканын жазган. Бул тууралуу анын Айнура аттуу кызы билдирген.

Апасын таап, сүйүнчүлөгөн адамга 100 миң сом сүйүнчү берилерин айткан.

«14-сентябрь күнү аталган айылдагы үйдөн чыгып кеткен бойдон дайынсыз болуп жатат. Ал эс тутум жагынан жабыркайт. Аны акыркы жолу 15-сентябрь күнү Виноградный айылындагы Чоң Чүй каналаны жактан көрүшкөн. Апамды таап, сүйүнчүлөгөн жаранга 100 миң сом сүйүнчү акы берилет» — деген ал.