Жалал-Абаддагы жарылууда жабыркаган кыз каза тапты. Дарыгер ооруканадагылар тууралуу айтып берди

Turmush — Жалал-Абад шаарында шербет даярдоочу жайда кислороддук баллон жарылып кетти. Анын кесепетинен жаракат алган кыз каза болду.

Жалал-Абад облустук клиникалык ооруканасынын дарыгери Икрам Вариванов Turmush басылмасына билдиргендей, бүгүн, 13-июлда таң эрте тез жардамга чалуу түшүп, бейтаптар алынып келе баштаган.

«Бүгүн орун алган жарылуудан алгач 20-24 жаштардагы кыз келди. Анын бети-башын таанып болбойт, ал бизге келгенге чейин эле каза болуп калган экен. Жансыз денеси өлүк сактоочу жайга жеткирилип, укук коргоо органдарына өткөрүлүп берилди. Андан сырткары тез жардам унаасы менен 3 адам жеткирилген, алар жолдон өтүп бара жаткан аялдар жана ошол жердеги банктын күзөтчүсү. Аларга медициналык жардам көрсөтүлдү», — деди ал.

Ал эми ӨКМдин Жалал-Абад облустук башкармалыгынын маалыматына караганда жарылуудан 4 адам жабыркады.

Алар:

1. 1992-жылы туулган А.С. (аял киши);

2. ⁠1992-жылы туулган Т.к.К, (аял киши);

3. ⁠М.О. (күзөтчү).

4. ⁠каза болгон кыз, анын өздүгү такталууда.

Буга чейин Turmush Жалал-Абад шаарында шербет даярдоочу жайда кислороддук баллон жарылып кеткенин жазган. Окуя бүгүн, 13-июлда болду.

Окуя болгон жерге өрт өчүрүүчүлөр жана тез жардам кызматы келген.