Жалал-Абаддагы 3 айылды борбор менен байланыштырган жол оңдолууда. 35 млн сом бөлүндү

Turmush — Маданият—Майлуу-Суу унаа жолунун 5 чакырым аралыгы реконструкцияланып жатат. Бул тууралуу Turmush басылмасына №22 жол тейлөө мекемесинин башчысы Нургазы Ажыкулов билдирди.

Анын айтымында, жолду оңдоп-түзөө үчүн 35 млн сом жумшалат.

«Мамлекеттик маанидеги Маданият—Майлуу-Суу жолунун жалпы узундугу 19 чакырымды түзөт. Жол союз учурунда, тактап айтканда 1960-1970-жылдары курулган. Бирок ошол жылдан бери жаңылана элек болчу. Жыл сайын биздин мекеме утурумдук оңдоп-түзөө жумуштарын аткарып келебиз. Бирок айрым жерлери таптакыр жарактан чыгып, жергиликтүү тургундардын нааразычылыгын жаратчу. Быйыл жолду оңдоп-түзөө үчүн долбоор даярдаганбыз. Ушул тапта 5 чакырым жолдун асфальты тазаланып, жолго жаңы асфальт төшөөгө даярдыктар көрүлүп жатат. Курулуштун наркы 35 млн сомдун тегерегинде, ал республикалык бюджеттен каржыланууда. Жумуштар июль айына чейин аягына чыгарылат», — деди Ажыкулов.

Мындан сырткары ал быйыл оңдолчу 5 чакырымдан сырткары кийинки жылы да унаа жолду оңдоо планы бар экенин кошумчалады.

Аталган унаа жолдон Ноокен районунун Кыпчак-Талаа, Кызыл-Кыя айылдарынын жана Майлуу-Суу шаарынын Көк-Таш аймагынын калкы облус борбору жана Бишкек шаары менен байланышып турат.