Жалал-Абадда автобус менен жүк ташыган унаа кагышты. Кырсык болгон жерден видео

Turmush — Жалал-Абад шаарында жүргүнчү ташыган автобус менен жүк ташыган унаа кагышты.

Күбөлөрдүн айтымында, кырсык кечээ, 27-октябрда калаанын Манас жана Р.Азимов көчөлөрүнүн кесилишинде болгон.

Ал эми Жалал-Абад муниципалдык автобазасынын жетекчиси Автандил Максүтовдун айтымында, кырсыктан эч ким жабыр тарткан жок.

«Жол кырсыгы кечээ саат 17:00 чамасында шаардык Спутник кичи районунда болду. Анда Манас көчөсүндө шагыл жүктөгөн «КамАЗ» каттуу ылдамдыкта келе жатып, жол чыракта кызыл жанып калганынан токтой албай, автобусту сүзгөн. Автобуста 2 жүргүнчү жана айдоочу болгон экен. Эч ким жараат алган жок. «КамАЗдын» айдоочусу күнөөсүн мойнуна алып, келтирилген чыгымды төлөп бермей болду», — дейт Максүтов.

Жалал-Абад облустук жол кыймылынын коопсуздугун камсыздоо бөлүмүнөн аталган жол кырсык каттоого алынбаганын билдиришти.

2023-жылдын 26-октябрында Жалал-Абад шаарынын күнүнө карата президент Садыр Жапаров 50 автобусту белекке берген болчу.