Turmush — Жалал-Абад облусундагы ички иштер органдарынын өздүк курамдары 20-21-март күндөрү жогорулатылган күжүрмөн даярдык баскычына кызмат өтөөгө өткөрүлдү. Бул тууралуу облустук милициянын басма сөз кызматы билдирди.

Нооруз майрамына арналган иш-чараларды өткөрүүдө коомдук тартипти жана жарандардын коопсуздугун камсыздоо, укук бузуулардын жана кылмыштуулуктун алдын алуу максатында иш жүргүзүлөт.

Бүгүн, 20-мартта Жалал-Абад ОИИБдин кызматкерлери майрам күнү коомдук тартипти көзөмөлгө алуу үчүн облус аймагындагы район жана шаарларда кызмат өтөөгө бөлүнүштү. Жалал-Абад ОИИБдин башчысы Жеӊишбек Абитов бөлүнгөн кызматкерлерди жер-жерлерде ак ниеттүүлүк менен кызмат өтөөгө чакырып, кызматтык тартипти бузбоону эскертти.

Нооруз майрамында миӊге чукул милиция кызматкери коомдук тартипти жана жол кыймылынын коопсуздугун камсыз кылат.