Turmush — Ысык-Ата районунда 3 окуучу «Алтын тамга» артыкчылык аттестатын алуу боюнча билимин тастыкташты. Алардын бири — Жаңыл Карыбаева. Ал Кант шаарындагы Д.Зубков атындагы №1 мектеп-гимназиясынын бүтүрүүчүсү.

Жаңыл 2007-жылы Кант шаарында төрөлгөн.

«Окуу мага оңой эле. Көп деле аракет кылбайм. Анткени сабактын баары эсимде калат. Мага бардык сабактар ​​жагат. Бирок алардын арасынан химияны баса белгилегим келет. Абдан кызыктуу илим. «Алтын тамга» алуу үчүн 11-класстын орто ченинде даярдана баштагам. Ошол кезде гана максат койгом. Ага чейин ал жөнүндө такыр ойлонгон эмесмин. Келечекте кандай кесиптин ээси болбоюн, ийгиликтүү болгум келет.

Ата-энем юрист, мен башка багытты тандайм. Күчтүү кардиохирург болом деген пландарым бар. Учурда И.К.Ахунбаев атындагы КММАга тапшырууну пландап жатам. Бош убактымда сүрөт тартам», — деди ал.

———

2023-2024-окуу жылынын жыйынтыгы менен «Алтын тамга» артыкчылык аттестатын алуу укугун 149 бүтүрүүчү тастыктады.

Аймактар боюнча:

Бишкек шаарынан – 68 окуучу,

Чүй облусунан – 20 окуучу,

Ош облусунан – 17 окуучу,

Жалал-Абад облусунан – 9 окуучу,

Баткен облусунан – 9 окуучу,

Талас облусунан – 8 окуучу,

Ысык-Көл облусунан – 6 окуучу,

Нарын облусунан – 6 окуучу,

Ош шаарынан – 6 окуучу.

Тестирлөө 14-майда республика боюнча 36 пунктта өткөрүлүп, ага 2211 окуучу катышты. Талапкерлер «Алтын тамга» тестин 4 предмет боюнча тапшырышты — математика, эне тили жана адабияты, Кыргызстандын тарыхы жана химия .

«Алтын тамга» тестинин жыйынтыгы боюнча 17-19-майда апелляция жүргүзүлүп, 181 кайрылуу түштү.

Былтыр «Алтын тамга» аттестатына 167 бүтүрүүчү ээ болгон.