Ысык-Көлдө 1 жылда 114,2 млн сомго бааланган жер тилкелер мамлекетке кайтарылды

Turmush — Өткөн жылы Ысык-Көл облусунун прокуратура органдары тарабынан келтирилген доо-арыздардын жыйынтыгы менен мамлекетке кайтарылган жер тилкелери боюнча фактылар Түп районунда көп кездешет. Бул тууралуу Ысык-Көл облустук прокуратурасынын бөлүмүнүн прокурору Темирбек Тешебаев билдирди.

Анын айтымында, 2021-жылы облуста жалпы 114 млн 289 миң 479 сомго бааланган 76,77 гектар жер тилкеси мамлекетке кайтарылды. Мисалы, Түп райондук прокуратурасы тарабынан 2021-жылдын 28-июнунда Ысык-Көл облустук сотунун административдик сотунда Түп райондук мамлекеттик администрациясынын 1992-жылдын 21-декабрындагы Б.М. аттуу жаранга 31 га жер тилкесин берүү жөнүндө токтомунун негизинде «Д» дыйкан чарбасына берилген жеке менчик укугу жөнүндө мамлекеттик актыны жараксыз деп табуу боюнча доо келтирилген. Кабыл алынып, күчүнө кирген соттук актылардын негизинде жогоруда белгиленген жеке менчик укугу жөнүндө мамлекеттик акты «Кадастр» мамлекеттик ишканасы тарабынан жокко чыгарылган. Аталган жер тилкеси 3 433 839 сомго бааланып, мамлекеттин менчигине кайтарылган.

• Кыргыз Республикасынын прокуратурасы Конститутциянын 105-беренесинин талаптарына ылайык, мыйзамдардын жана башка ченемдик укуктук актылардын так жана бирдей аткарылышына көзөмөл жүргүзөт. Ошондой эле мамлекеттик жана муниципалдык менчике кол салуулардын ар кандай формалары менен күрөшүү, мыйзамсыз жеке менчикке өтүп кеткен мамлекеттик жана муниципалдык мүлктөрдү кайтаруу, келтирилген зыяндын ордуна коюулушу прокуратура органдарынын ишмердүүлүгүндөгү артыкчылыктуу багыттардын бири болуп саналат.