Turmush — Ысык-Көл облусунун аймагында уурулукка шектүү катары 26 жаштагы тургун кармалды. Бул тууралуу Ысык-Көл ОИИБдин басма сөз кызматы билдирди.

Маалыматка караганда, үстүбүздөгү жылдын 20-майында Каракол ШИИБге 1995-жылы туулган тургун Ж.А. арыз менен кайрылган.

Ал 18-май күнү саат 11:20 чамасында Каракол шаарында жайгашкан медициналык борборунун кабыл алуу бөлмөсүнөн «Samsung Galaxy A34» үлгүсүндөгү уюлдук телефонун белгисиз адам уурдап кеткендигин билдирген. Ошондой эле, арыз менен 18-май күнү Ак-Суу районунун 1981-жылы туулган тургуну М.Э. кайрылып, ошол эле күнү саат 8:30 чамасында Ысык-Көл облусттук ооруканын хирургия бөлүмүнүн палатасынан өзүнө таандык «Xiaomi Redmi 10» үлгүсүндөгү уюлдук телефонун белгисиз адам уурдап кеткенин билдирген.

Аталган факттылар Каракол ШИИБдин КБРне катталган, Кылмыш-жаза кодексинин 205-беренесинин (уурулук) негизинде катталып, кылмыш иши козгологон.

Каракол ШИИБдин кызматкерлери тарабынан ыкчам иш-чаралар жүргүзүлүп, кылмышка шектүү изин жашырып жүргөн жеринен колго түшүрлүп, тергөө кызматына өткөрүлүп берилди. Ал мурда ушундай эле кылмыш менен жоопко тартылган Жети-Өгүз районунун Тилекмат айылынын 1998-жылы туулган тургуну Т. уулу А. болуп чыккан.

Шектүү аталган фактылар боюнча күнөөсүн толугу менен мойнуна алып, Каракол шаарынын сотунун чечиминин негизинде 2 айга убактылуу кармоочу жайга киргизилген.

Каракол шаарынын ички иштер бөлүмүнүн кызматкерлери тарабынан аталган шектүү тараптан башка ушул сыяктуу уурулук жана тоноочулук кылмыштарга тиешеси бар же жок экендиги такталууда.