Ысык-Көлдө күтүүсүз окуяга туш болгон Казакстандын жараны эртеси ооруканада каза тапты

Turmush — Ысык-Көл районунун Кара-Ой айылындагы пляжда 42 жаштагы Казакстандын жараны каза тапты. Бул тууралуу Ысык-Көл ОИИБдин басма сөз кызматы билдирди.

Маалыматка караганда, 2024-жылдын 14-июль күнү Ысык-Көл райондук ички иштер бөлүмүнө Ысык-Көл райондук ооруканасынан абалы оор жаран боюнча кабар келип түшкөн. Анда Казакстандын 1982-жылы туулган жараны К.Б. (эркек киши) ооруканага жеткирилген.

Кара-Ой айылындагы эс алуу жайларынын биринин пляжында аны суудагы катер сүзүп, натыйжада оор жаракат алган. Окуя 15-июль күнү саат 18:25 чамасында катталган.

Текшерүүнүн жүрүшүндө суудагы катердин ээсинин өздүгү такталды. Ал Ысык-Көл районунун 1992-жылы туулган тургуну М.Б. болгон. Ал эми катерди Кара-Ой айылынын 2006-жылы туулган тургуну А.А. айдап жүргөн.

2024-жылдын 16-июль күнү жаран К.Б. алган жаракатынан улам Ысык-Көл райондук ооруканасынын жандандыруу бөлүмүндө көз жумган. Өлүмдүн себебин аныктоо үчүн соттук-медициналык экспертиза дайындалды.

Бул факт Ысык-Көл РИИБи тарабынан Кылмыш-жаза кодексинин 127-беренеси (этиятсыздыктан өлүмгө алып келүү) жана 311-беренеси (темир жол, аба же суу транспортунун кыймылынын жана аларды эксплуатациялоонун коопсуздук эрежелерин бузуу) боюнча кылмыш иштери козголду.

Учурда тергөө иштери жүрүп жатат.