Turmush — Бүгүн, 28-май күнү Жыргалаң суусуна түшүп кеткен экинчи кыздын сөөгү табылды. Бул тууралуу аймактык кабарчы билдирди.

Маалыматка караганда, суучулдар кызматы жана №15 ӨКБнын куткаруучулары тарабынан 7 жаштагы кыздын жансыз денеси Дача тилкесиндеги көлдүн «Тихий» пляжынан 500 метр аралыкта табылып, туугандарына өткөрүлүп берилди.

2024-жылдын 18-майында Жыргалаң суусуна Михайловка айылынын тургундары — 2017-жылы туулган К.М.Т жана 2016-жылы туулган Т.С.Б. сууга түшүп кеткен.

Бир жумадан өткөн соң — 25-майда 2016-жылы туулган Т.С.Б.нын жансыз денеси табылган.

Жергиликтүү тургундар Тurmush басылмасынын кабарчысына окуя тууралуу айтып беришкен.

«Айылдагы 2 кичинекей кыз 18-майда болжол менен саат 16:00 чамасында үйлөрүнөн чыгып кетишкен экен. Алар Жыргалаң суусунун жээгине келип ойношкон. Кыздардын жанында дагы жашы жете элек эки бала болгон экен. Ойноп жатып, суунун жээгине жакын турган кыздар сууга түшүп кетиптир. Сууга агып бара жаткан кыздарды ошол жакта уй кайтарып жүргөн 2006-жылы туулган бала көрүп, бирок куткара албай калгант», — деген алар.

Тургундар суу шар агып, ылайланганына байланыштуу издөө иштерине кыйынчылык жаратып жатканын кошумчалаган.

Кыздар №25 Шевченко атындагы орто мектепте окуп жатышкан. Мугалимдери кыздар сабакты калтырбаган аракетчил окуучу экенин айтышты.

Алардын айтымында, 2017-жылы төрөлгөн К.М. даярдоо классында окуп жаткан. Мүнөзү жоош, кабыл алуусу жакшы, зирек кыз. Үй-бүлөдө 4 бир тууган.

2016-жылы төрөлгөн Т.С. 1-класста окуп жаткан. Ал эки бир туугандын улуусу.

«Жакшы окуган, мүнөзү ачык, жароокер, курбулары менен бат тил табышкан кыз. Ырларды бат жаттап, окууга шыктуу», — деген мугалимдер.