Turmush — Ысык-Көл облусунун Тоң районуна караштуу Б.Мамбетов айыл аймагында селге кабылган чет элдик жарандарга куткаруучулар жардам беришти. Бул тууралуу ӨКМдин басма сөз кызматы билдирди.

Маалыматка караганда, кечээ, 1-июлда саат 23:30 чамасында жааган жамгырдын кесепетинен Б.Мамбетов айыл аймагына караштуу Ак-Сай тилкесинде сел жүргөн.

Көлгө түшүп эс алып, жээкте чатыр менен түнөккө калышкан россиялыктар селге кабылышкан. 11 туристтин кийим-кечелерин, буюмдарын агызган.

Аларга ӨКМдин Тоң району боюнча өзгөчө кырдаалдар бөлүмүнөн куткаруучулардын ыкчам тобу жардам беришкен.

Туристерди сел жүргөн аймактан аман-эсен Бөкөнбаев айылындагы жатаканалардын бирине жайгаштырышкан.

Эс алуучулардын арасында жабыркагандар жок.