Turmush — Ысык-Көл облусунун аймагында акыркы күндөрү катары менен кар жаап жатат. Жумушу менен алыскы аймактарга барган жарандардын жолдо калган учурлары болууда, деп билдирет аймактык кабарчы.

Жол чарба департаментинин маалыматына ылайык, 16-февраль күнү Каракол—Эңилчек унаа жолунун 38-95-чакырымында кардын көп жаагандыгы жана катуу бороон болуп өткөндүгүнүн кесепетинен жол каттамы жабылган. 17-февраль күнү Эңилчек тараптан келе жаткан унаа Каракол—Эңилчек жолунун 82-чакырымында кар курткүлөрүндө калган.

«Унаадагы Каракол шаарынын 45 жаштагы тургуну жана Ак-Суу районунун 30 жаштагы тургуну ошол жакта жайгашкан биздин пункта 2 күн жашашты. Аларга убагында жылуу жай, тамак-аш берилип турду. Жол ачылып, унаасы менен кошо ылдый жакка аман-эсен түшүрүлдү. Аны менен катар аталган ашууда калган 4-5 жаранга да жардам берилип, баары убагында ылдый түшүрүлдү.

Бул жолдо кар күрткүлөрдүн бийиктиги 1.5-2метрге жетип жатат. Жолдун 46-49-64-76-83-84-85-чакырымдарынан кар көчкүлөр түшкөн дагы кар көчкү түшүү коркунучу бар болууда. Учурда тазалоо иштери улантылып жатат. 2 даана бульдозер унаасы, 1 даана ДТ-75 унаасы тазалоо иштерин жүргүзүүдө», — деп айтылат маалыматта.

Түп—Кеген жолунда бороон болуп, жолдун 39-76-чакырымдары жана Каркыра — Чаар-Кудук 0-13-чакырымдары тазаланып, жол кыймылынын катышуучуларына эч кандай тоскоолдуктар жок. Аймактарда кар жаап, катуу шамал болуп жатат. Мындан улам кар жолго үйлөп кыймылга тоскоолдук берүү коркунучу болууда. Ал эми Жети-Өгүз районун Сөөк ашууда да бороон болуп жатканы маалымдалды.

Буга чейин кардын калың жааганынан улам Ысык-Көлдөгү лыжа базадан түшүп келе жаткан унаалар тайгаланып жаткан учур видеого түшүп калган.