Ысык-Көлдө ардагерлер спорттун 4 түрү боюнча күч сынашты

Turmush — Ысык-Көл облусунда милициянын ардагерлери арасында спорттун 4 түрү боюнча мелдеш өттү. Бул тууралуу Ысык-Көл ОИИБдин басма сөз кызматы билдирди.

Маалыматка караганда, спорттук иш-чара Ысык-Көл ОИИБдин «Динамо» спорт комплексинде кыргыз милициясынын 100 жылдыгына, ОИИБдин башчысы, милициянын генерал-майору Мурат Бороновдун кубогуна арналып уюштурулду.

Мелдеш спорттун төрт түрү: волейбол, стол тенниси, шахмат жана аркан тартыш боюнча өттү. Ага 40 жаштан 83 жашка чейинки 200гө жакын ардагерлер катышып, алардын 150дөн ашыгы спорт аянтчаларына чыгышты.

«Бул иш-чара жөн гана мелдеш эмес, ардагерлер үчүн жолугушуу мүмкүнчүлүгү. Бул маараке биздин кызматтын узак жана даңктуу тарыхын чагылдырат, ошондой эле милициянын коомдогу маанилүү ролун эске салат. Спорт — рухтун, биримдиктин жана командалык аракеттин күчтүү кыймылдаткычы. Бүгүнкү күндө биздин ардагерлер эрдиктин, ишке берилгендиктин жана ар-намыстын үлгүсү болуп келишет», — деди Мурат Боронов.

Кубоктун жыйынтыгы:

— 1-командалык орунду Балыкчы шаарынын ардагерлери;

— 2-орунду Каракол шаарынын ардагерлери;

— 3-орунду ОИИБдин ардагерлери ээлешти.

Волейболдо Тоң районунун ардагерлери жеңишке жетишип, 2-орунду ОИИБдин ардагерлери, 3-орунду Балыкчы шаарынын ардагерлери, ал эми 4-орунду Түп районунун ардагерлери багындырды. Иш-чарада шахмат оюну боюнча жеңүүчүлөр жана 1951-жылы туулган Чымыров Турдубек Шаршеналиевич «Эң улуу катышуучу» номинациясы менен сыйланды. Ошондой «Катышуу» сыяктуу наамдар берилди. Аларга медалдар жана баалуу сыйлыктар тапшырылды.