Turmush — 27-июнь күнү Жумгал районунда Көкөмерен дарыясына агып кеткен кыздын сөөгү табыла элек. Бул тууралуу Turmush басылмасынын аймактык кабарчысына анын жакындары билдиришти.

Маалыматка караганда, райондун Чоң-Арал айылындагы Көкөмерен суусуна 2 кыз жана З.Т. аттуу аял агып кеткен. Адамдар 2015-жылы туулган А.Ч. аттуу кызды куткарып, тез жардам кызматына өткөрүп беришкен. Аны Бишкектеги ооруканага алып кетишти.

Сууга агып кеткен аял менен экинчи кыз дайынсыз болуп жаткан. 28-июнь күнү саат таңкы 06:30 чамасында Беш-Терек айылынын 1985-жылы туулган тургуну З.Т.нын сөөгү табылган. Ал кечээ, 29-июнда жерге берилди.

Ал эми Бишкек шаарынын 2012-жылы туулган тургуну, С.М. аттуу кызды издөө иштери улантылып жатат. Анын жакындары бийликтен жардам сурап, кошумча күч жана суучулдарды суранып жатышат.

Кечээ, 29-июнь күнү издөө ишине Жумгал районунан 19 куткаруучу, жергиликтүү тургундардан 49 адам жана Жумгал РИИБден 10 кызматкер тартылып, бирок табылган эмес.

Бүгүн, 30-июнь күнү куткаруучулар, жергиликтүү тургундар, милиционерлер болуп жалпы 80 адам жана 1 дрон издөө иштерин жүргүзүп жатат.

Чаек айыл аймагынын аппарат кызматкерлери 1 күндүк эмгек акыларын чогултуп, издөө ишин жүргүзүп жаткан адамдарга ысык тамак уюштурушууда.