Turmush — Ысык-Көл облусунун Жети-Өгүз районунда күйөөсүн өлтүрүүгө шектелген аял эки айга камакка алынды.

Ысык-Көл облустук сотунун басма сөз кызматы Turmush басылмасына билдиргендей, 1979-жылы туулган шектүүнүн баш коргоо чарасы аныкталды.

Жети-Өгүз райондук сотунун 2024-жылдын 6-июнундагы токтому менен Жети-Өгүз РИИБдин тергөөчүсүнүн өтүнүчү канааттандырылды. Шектүүү С.Г.Б.га карата эки айлык мөөнөткө, тактап айтканда 2024-жылдын 4-августка чейин камакка алуу түрүндөгү бөгөт коюу чарасы колдонулду.

Буга чейин Turmush Жети-Өгүз районунун айылдарынын биринде жубайлардын үй-бүлөлүк чырынан кийин күйөөсү каза болуп, аялы камакка алынганын жазган.

Айрым маалыматтар боюнча, аялы үй-бүлөлүк жаңжал учурунда жолдошун бычак менен сайып жиберген.

Ысык-Көл ОИИБ тастыктаган маалымат боюнча, 4-июнь күнү Жети-Өгүз РИИБге айылдардын бириндеги үйдө 1980-жылы туулган адам каза тапканы жөнүндө билдирүү түшкөн. Ал жерге ыкчам тергөө тобу барып, маркумдун денесинен зомбулуктун белгилери аныкталган. Аталган факт Кылмыш-жаза кодексинин 122-беренесинин (адам өлтүрүү) негизинде каттоого алынган. Кылмышка шектүү катары маркумдун 1979-жылы туулган аялы кармалган.

Учурда соттук-медициналык эспертизалар дайындалып, тергөө иши жүрүүдө.

Окуя болгон айылдын тургундары Turmush басылмасынын кабарчысына айрым жагдайларды айтып беришкен. Айылдаштарынын айтымында, каза болгон 44 жаштагы тургун кечээ, 5-июнда жерге берилди. Анын каза болгону тууралуу маалымат айылга 4-июнда таңкы саат 05:00 чамасында тараган. Жубайлардын 4 кызы бар.

Жергиликтүү бийликтин маалыматына караганда, аталган үй-бүлө 14 жылдан бери айыл өкмөттүн социалдык бөлүмүнүн көзмөлүндө турчу.

«Үй-бүлөнүн 2007-2009-2011-2017-жылдары туулган төрт кызы бар. 2010-жылдан тарта айыл өкмөттүн социалдык бөлүмүнүн көзмөлүндө турчу. Анткени жубайлардын туруктуу иштеген жумушу жок болуп, күнүмдүк жумуштарда иштеп, жардамга муктаж үй-бүлө болгон. Спирт ичимдиктеринин айынан дайыма уруш-талаш болуп тургандыктан мектептин социалдык мугалими, тилкелик нускоочу болуп үйүнө барып, ар тараптан колдоо көрсөтүп турушчу», — деп айтылат Жети-Өгүз айыл өкмөтүнүн маалыматында.

Учурда кыздар атасынын туугандарына тил кат менен тергөө иштери бүткөнгө чейин берилди. Алар үйүндө туугандарынын жана социалдык мугалим, айыл өкмөттүн социалдык бөлүмүнүн көзөмөлүндө экени маалым болду.